(AP) – Entre imagennan di e bombardeo di casnan y cayanan na Gaza, algun a sobresali pa e horor inmesno; babynan sangriento y bandona. Mira pa miyones online desde cu e guera a cuminsa, e imagennan aki ta crea usando inteligencia artificial.
Si bo mira nan di cerca, bo por mira dedenan cu ta bira di manera straño of wowonan cu ta briya cu un luz cu no ta natural, tur señal cu e imagen a ser crea digitalmente. Sinembargo, e horor y rabia cu e imagennan aki ta causa ta real. Potretnan di e guera entre Israel y Hamas a dolorosamente ilustra AI su potencial como un herment pa propaganda, usa pa crea imagennan cu ta parce real.
Desde cu e guera a cuminsa luna pasa, e imagennan cu ta crea digitalmente a plama riba rednan social y nan a ser usa pa haci acusacionnan falso tocante e responsabilidad di e mortonan of pa gana hende tocante atrocidadnan cu nunca a tuma luga. Mientras mayoria di e acusacionnan cu ta circula online tocante e guera no tabatin mester di AI y a bini for di fuentenan mas convencional, avancenan tecnologico ta biniendo cu un frecuencia den aumento y cu tiki bista riba dje. Esaki a haci e potencial pa AI bira otro forma di arma sumamente aparente y a ofrece un bista di loke ta den futuro conflictonan, eleccionnan y otro eventonan grandi.
“E lo bira pio, hopi mas pio, prome cu e situacion mhora,” Jean-Claude Goldenstein, CEO di CREOpoint, compania basa na San Francisco y Paris cu ta haci uso di AI pa evalua con valido acusacionnan online ta, a expresa. E compania a crea un base di dato di e imagennan falso mas viral cu a sali for di Gaza. “Potretnan, video y audio; cu AI generativo e lo yega un escala cu nunca antes nos a yega di mira.”
Rond di mundo tin un cantidad di agencianan di tecnologia cu ta trahando riba programanan nobo cu por distingui e ‘deepfake’ for di imagennan real,aplica logo cu ta informa tocante su origen of ta scan texto pa verifica cualkier acusacionnan of ponencia cu por a ser poni pa AI. “E proximo ola di AI lo ta; Con nos por verifica e contenido cu tin den publico. Con bo por detecta mal informacion, con bo pro analisa texto pa determina si e ta confiabel?” Maria Amelie a expresa.
E tipo di programanan aki lo ta di interes inmediato pa educadornan, reporteronan, analistanan financiero y otronan interesa den saca afo cua ta e contenidonan falso,plagiarismo of fraude. Programanan similar ta ser diseña pa saca afo cua ta imagennan of videonan crea.
Mientras e tecnologia aki ta mustra prometedor, esunnan usando AI pa gana hopi biaha ta un paso mas dilanti segun David Doermann, un cientifico di computer cu a ldiera esfeurso na Defense Advanced Research Projects Agency pa responde na menasanan di siguridad nacional cu imagennan manipula pa AI ta trece. Doermann, ken awo ta un profesor di universidad, a bisa cu efectivamente responde na e desafionan politico y social di inteligencia artificial su mal informacion lo rekeri ambos miho tecnologia y miho regulacion, standardnan boluntario den e industria y inversionnan extenso den e programanan di literatura digital pa yuda usuarionan di internet por saca afo e maneranan cu por distingui berdad for di fantasia. “Cada biaha cu nos lansa un herment cu por detecta esaki, nos adversarionan por usa inteligencia artificial pa cubri e evidencia,” Doermann a splica. “Detection y purba di delete esaki no ta e solucion mas. Nos tin cu yega na un solucion hopi mas grandi.”
