Ayera atardi ariba su pagina oficial di Facebook DOW Aruba a publica tocante un situacion lamentable cu a tuma luga den centro di ciudad. Ta trata di hortamento di luznan di Pasco cu a pone pa ilumina y decora centro di ciudad pa temporada di Pasco.
“Un situacion fastioso a surgi den caya grandi. Ayera nochi nos a bin ripara cu individuonan a horta luznan y ranca wairanan cu a ser poni den caya grandi,” e publicacion a indica.
DOW ta remarca cu esaki ta un situacion hopi fastioso, ta cu e trahadornan a traha duro den dia y anochi pa asina pueblo completo por disfruta di e dushi temporada di fin aña cu ta acercando. “Un situacion di lamenta,” el a subraya.
Algun usuario di e plataforma a comenta ariba e publicacion y a expresa nan opinion, den su mayoria malcontento, pa e situacion y e actonan di e ciudadanonan aki cu a horta y vandalisa e decoracionnan di Pasco den caya grandi.
“Tin basta camara rond eybanda busca e imagennan y boso lo haya sa ta ken. Porta ta e chillernan mes ta haci vandalismo,” un usuario a comenta.
“Ta di spera cu chollernan cu ta cana rond den caya grandi,” otro a indica.
“Camara y pone potret di esun of esunnan cu ta contra pa drecha caya grandi, ya pueblo por haya sa ta ken ta contra pa embeyece caya grandi. Y si haya sa autoridad pone man y cera nan te despues di 6 januari. Ta destruccion e ta y ley ta permiti cera nan pa nan siña,” un otro usuario a remarca.
Mientras cu otro a señala: “Mester por a premira cu lo tin malhechornan cu lo haci esey. Mester a pensa riba security. Tristo con nos mes hendenan ta actua asina.”
