(AP) — Elton John a urgi legisladornan Britanico pa haci mas pa combati HIV y AIDS, bisando cu Reino Uni por ta e prome pais na mundo pa “derota e virus terible aki.”
E strea Britanico a papia cu legislador y campañadornan na e Speaker’s House of Parliament diaranson anochi na un evento honrando su dedicacion pa bringa HIV na Reino Uni y mas leu.
“Mi ta implora boso pa no desperdicia e tempo otorga na boso como lidernan politico,” John a urgi decenas di legisladornan den e camber decora cu oro. “Tuma accion y pusha cos un tiki mas leu cu por sinti comodo. Y mientras boso ta hacie, mi por priminti boso esaki: Ami ta bay t’ey cu boso.”
John a set up su AIDS Foundation na 1992 y a yuda genera miyones di dollar pa preveni infeccion di HIV y reduci stigma. “E anochi aki mi tabatin e privilegio di duna bon bini na Sir Elton John y reconoce su contribucion excepcional na e lucha global contra HIV y AIDS – personalmente y a traves di e Elton John AIDS Foundation,” Commons Speaker, Lindsay Hoyle a bisa riba X.
“Su trabao ta encarna e solidaridad y bondad cu ta defini nos humanidad comparti,” el a agrega.
John a ricibi e “noticia berdaderamente maraviyoso” cu gobierno Britanico a dicidi a extende un programa piloto pa test hende bishitando salanan di emergencia di hospital pa HIV, loke oficialnan a bisa a descubri centenares di casonan no detecta di e virus.
Bao di e programa, cu recientemente a introduci na London y otro ciudadadnan cu un prevalencia halto di casonan di HIV, cualkier persona di 16 aña of mas di edad cu haci test di sanger den un sala di emergencia tambe ta bay test pa HIV, Hepatitis B, Hepatitis C, a menos cu nan opta pa no haci e test.
“Test automatico ta yega na hende mas trempan, loke ta nifica menos transmision di HIV, menos malesa, menos morto y segun calculacion di economistanan di salud, $63 miyon cu ta spaar pa NHS,” e servicio di salud Britanico, segun John a bisa.
Oficialnan di Salud a confirma cu lo aumenta e programa na 46 mas departamento di emergencia na Inglatera, yudando alcansa e aproximadamente 4,500 persona na Inglatera cu por ta bibando cu HIV sin diagnostico.
E recepcion di John den Parlamento a yega prome cu Dia Mundial di AIDS, cu ta tuma lugar awe diabierna. Reino Uni tin speransa pa logra cero transmision di HIV na Inglatera pa 2030, den linea cu metanan di Organisacion Mundial di Salud (WHO).
Anteriormente diaranson, prome minister Rishi Sunak tambe a duna tributo na e AIDS Foundation di John, bisando cu e tabata complaci cu ta celebrando su trabao den Parlamento. “Sir Elton ta un voz poderoso pa cambio na Reino Uni y rond mundo,” Sunak a bisa legisladornan. “A traves di e tremendo trabao di e AIDS Foundation el a crea conscientisacion pa e asunto, a reduci stigma y a salba bida.”
