(ElNacional) – Den 2022, por lo menos 343 persona a muri pa motibo di malaria na Latino America, locual ta refleha un caida di 60% den comparacion cu e mesun dato di aña 2000, segun e rapport global tocante e enfermedad aki publica pa e Organisacion Mundial di Salud (OMS).
Ademas, e continente Americano a registra 550 mil caso nobo di e enfermedad conoci tambe manera “paludismo”, un 64% menos cu 22 aña atras, ora cu a reporta 1.5 miyon caso.
Riba nivel mundial, e casonan di malaria contabilisa den Latino America a yega na solamente 0.2% di e contagionan global reporta den 2022.
Brasil, Colombia y Venezuela a lidera e lista di paisnan den e continente Americano cu mas contagio, acumulando un 73% di tur e casonan di malaria registra den e region, aunke cu un caida basta notable desde e comienso di e pandemia di COVID-19.
Segun e rapport di OMS, e factornan cu a contribui na e caida aki di e casonan di malaria na e paisnan aki tabata e restriccionnan di biahenan durante e cuarentena y e reciente aumento di e disponibilidad y uso di productonan di diagnostico y tratamento.
Asina, na Venezuela a reporta 154 mil caso di malaria den 2022, un dato cu ta den contraste cu e dato di un aña pasa, ora cu e casonan di malaria registra na e pais Caribense tabata 205 mil.
Sinembargo e rapport di OMS tambe ta alerta di un aumento di casonan di malaria na shete pais di e continente Americano aña pasa: Costa Rica, Bolivia, Guyana, Haiti, Honduras, Nicaragua y Panama.
Haiti tabata e pais mas afecta pa e aumento aki, cu un total di 17.272 casonan nobo calcula di malaria, sigui pa Panama cu 4.826 y Nicaragua cu 3.683.
Di otro banda, Belize a bira e aña aki e di cuater pais di America cu a wordo certifica manera liber di malaria pa e organisacion sanitario di Nacionnan Uni, despues di mas di 70 aña di esfuersonan continuo pa elimina e enfermedad.
E ta uni na el Salvador, Argentina y Paraguay, paisnan cu a wordo reconoci cu e logro aki tambe na 2021, 2019 y 2018, respectivamente.
