Esnan den Parlamento cu ta contra supervision financiero den rijkswet ta MEP cu AVP

Den un entrevista recien, parlamentario Ryçond Santos do Nascimento a comenta riba e negociacionnan entre gobierno di Aruba y Hulanda pa ley di supervision financiero. Segun Santos do Nacimento, motibo pakico parlamentarionan di MEP y AVP ta contra hancra supervision financiero den un ley di Reino tin di haci cu un economia coruptivo.

Den rueda di prensa despues di reunion di Coseho di Ministro di Reino diabierna pasa, Secretario di Estado Alexandra van Huffelen a anuncia cu el a yega na un acuerdo cu gobierno di Aruba encuanto e cambionan cu mester haci den e ley di Aruba di supervision financiero (LAft). E cambionan aki mester ta aproba y na vigor entrante 1 di januari 2024. Loke a keda pendiente ainda ta un acuerdo tocante un ley di supervision financiero (RAft), pa cual lo continua e discusion entre e dos gobiernonan.

Gobierno demisionario di Hulanda tin un mandato pa sigui negocia cu gobierno di Aruba tocante introduccion di un ley di Reino pa supervision financiero, pa cual no tin un fecha limite determina. Tanten no tin un acuerdo, Aruba lo mester paga un interes di 6,9% riba e prestamonan di 2020. Esaki por bira 5,1% na momento cu tin un acuerdo encuanto e forma y contenido di un ley di Reino. Na momento cu tin un ley di Reino vigente, Aruba lo por haya un interes di 3,2%. Despues di un acuerdo ainda por dura bastante tempo pa un ley di Reino haci e recorido legal necesario y te e tempo ey Aruba lo no mira e porcentahe mas faborable bira realidad. Bon Dia Aruba a acerca Prome Minister, Evelyn Wever-Croes, pa confirma si e informacion aki ta corecto. “Nos no a haya confirmacion di Den Haag ainda. Asina cu tin confirmacion mi ta informa,” Prome Minister a bisa.

Den e contexto aki, Bon Dia Aruba a acerca parlamentario independiente y lider di partido Lucha pa Reforma, pa haya un perspectiva for di Parlamento di Aruba tocante e negociacionnan pa cambionan den ley di supervision financiero na Aruba.

Santos do Nascimento a cuminsa splicando cu tin hende ta confundi e negociacionnan tocante un ley local (LAft) y un ley di Reino (RAft) pa cu supervision financiero. “E bottom-line ta esaki: Hulanda a exigi cu nos mester tin supervision financiero. Esey ta los un rato di tur cos,” el a comenta. “E ta algo cu a bin desde 2015 pa motibo cu si bo wak aña 2011-2012-2013-2014, tabatin un promedio di un deficit di 300 miyon pa aña. Esey ta ban bisa e background pakico Hulanda a bin hopi mas fuerte riba e exigencia cu mester tin supervision financiero.

Durante e pandemia di Covid, Aruba a fia mas o menos 915 miyon florin for di Hulanda, y e placa ey mester pag’e back. “Hulanda a bisa, no matter what, nos ta financia, nos lo percura pa un refinanciamento di e placa. Y Hulanda a bisa, ‘nos lo refinancia na e porcentahe di interes conforme e credit rating di Aruba. Kiermen, esey ta garantisa. Awo, pa ‘sweeten the deal’, nan a bisa ‘nos kier pa supervision financiero ta hancra den rijkswet’, cu ta un ley mas halto, e ta mas halto cu nos comptabiliteitsverordening, cu e LAft, e ta mas halto cu nos mesun constitucion.”

Aruba no ta respeta nos mesun leynan

Segun Santos do Nascimento, tin varios motibo pa Hulanda exigi esaki. Un di e motibonan ta den practica financiero di Aruba, no ta respeta nos mesun leynan. “Por ehemplo, nos Constitucion ta bisa ki ora mester entrega un presupuesto. Historicamente, nos no ta worry cu e fecha ey.”

Pa di dos, nos Constitucion ta bisa cu nos mester tin un cuenta anual (jaarrekening). Aruba no ta cumpli cu esey manera debe ser. “Ora cu bo ta wak e ley di comptabilidad cu nos tin, hopi biaha nos no ta cumpli cu e ley aki. Tin biaha Gobierno ta bin despues cu un ley cu forsa retroactivo pa drecha locual eigenlijk no ta cuadra cu ley.” Den esaki tambe Hulanda tambe a mira cu un Landsverordening, esta un ley di Aruba cu ta hancra supervision financiero, “ta un ley cu ta den e esfera politico di Aruba. Esey ta nifica cu gobierno cu parlamento por cambi’e.”

“Tin motibo pa Hulanda tin cierto preocupacion riba e area aki, pasobra Sr. Rocco Tjon y Sr. Ady Thijsen a bin cu un amienda, Parlamento a aproba un amienda di e supervision financiero cu lo a elimina e laso cu Hulanda den supervision financiero na 2018. Kiermen e ta basta fresco ainda, nos ta papiando di Gabinete Wever-Croes I.” Esakinan ta motibo pakico Hulanda kier hancra supervision financiero den un rijkswet.

Administracion financiero deficiente cu ta conduci na medida

Ademas, e rijkswet cu Hulanda a propone tin reglanan hopi mas estricto pa administracion financiero di Aruba. “Pasobra e realidad ta cu si nos bay back for di 1986 te awo, nos administracion financiero simplemente no ta na ordo. E cuestion cu nos no tin e cuentanan anual na tempo ta un indicacion caba cu bo administracion financiero no ta na ordo.”

“Esaki ta e preocupacionnan di Hulanda pasobra na momento cu Aruba no por paga debe back – y den esey mester bisa algo, pasobra Aruba tur ora ta bisa ‘si semper nos a paga’, pero structuralmente nos ta pushando e pago di e debe atras, y dado momento e no ta sostenible mas. E ta cuminsa exigi cu bo ta bin cu mas medida. Y nos ta wak e efectonan caba, un di nan ta por ehemplo e BBO na frontera, aumento di BBO cu 1%, ta indicacionnan cu pa cuminsa tin un maneho financiero, e entradanan cu nos tabatin no ta suficiente. Gobierno mester genera mas placa, y con gobierno ta genera mas placa? Door di aumenta impuesto riba e ciudadano.”

 

Pues banda cu e administracion financiero ta bon, Hulanda kier pa nos cumpli cu cierto exigencianan. Un di nan ta cu mester tin structuralmente un surplus, y pa cuminsa baha gasto di personal na un manera structural.

Strafrente?

Santos do Nascimento ta destaca cu “e palabra ‘strafrente’ a sali for di un mocion di Tweede Kamer, cu si Aruba no acepta e rijkswet, lo bin e strafrente. Pero prome cu esey caba, ya gobierno di Hulanda y Van Huffelen a ofrece gobierno di Aruba e deal cu si bay di acuerdo pa hancra supervision financiero den e rijkswet, nos lo duna bo na interes di Hulanda, cu ta un interes mas abao.” Es decir, cu en bes cu e interes halto tabata un castigo, e interes mas abao tabata un oferta pa acepta cierto condicion.

“Si bo bay back y wak loke Hulanda tabata exigiendo, ta di prome caba cu Hulanda tabata papia di rijkswet. No ta Tweede Kamer a bin cu e exigencia. E palabra ‘strafrente’ ta indica si cu un mayoria den Tweede Kamer ta haya cu nos gobernantenan ta actuando iresponsablemente, y p’esey e palabra ‘straf.’”

Aprobacion di Parlamento pa rijkswet

Mirando cu na mas cu un ocasion, prome minister Evelyn Wever-Croes a indica cu Parlamento no ta dispuesto pa duna aprobacion pa un rijkswet pa supervision financiero, a puntra Santos do Nascimento riba e posicion di Parlamento.

“E problema cu nos tin na Aruba ta cu bo ta scucha cu hende kier supervision financiero, pero e realidad ta cu nunca nos no tabata kier esey,” el a comenta. “E realidad ta cu [MEP y AVP], pa nan por financia e tamaño di e partido – pasobra nan ta partidonan grandi – pa por financia campaña, nan mester hopi placa. Anto e ora loke bo ta wak ta full un economia ta surgi rond di e partido. Un parti di e economia ey ta un economia fraudulento y coruptivo.” E ora pa e partidonan aki por keda na poder, no ta cumbini pa tin hopi supervision for di Hulanda. “Kiermen no tin un interes pa supervision financiero.”

Pa por introduci supervision financiero na 2015, Hulanda a pone hopi presion. “Pa cuminsa, a stop un presupuesto di pais Aruba, gewoon a bisa no ta firma e presupuesto.” Pues bao hopi presion a acepta pa bin cu supervision financiero. “Anto den e negociacionnan, gobierno a bisa e tempo aya, ‘no laga nos perde cara asina hopi, please. Laga nos hancra esaki den un landsverordening. Nos ta laga e laso cu Reino, tur cos ta OK, pero nos ta hink’e den un ley di nos mes, comosifuera anos a hacie’. Awo bo ta haya e mesun cos, y bo ta wak efectivamente, esnan cu ta contra e supervision financiero hancra den un rijkswet na e momento aki, di e personanan cu ta den Parlamento, e ta hustamente AVP cu MEP. Anto e ta un señal atrobe, cu nan ta ‘bringa brasa’. Pasobra tur ora nan ta critica otro, pero na e momentonan aki unda nan ta wak cu nan monopolio riba poder na Aruba ta na peliger, bo ta wak con lihe nan ta brasa otro.”