A traves di un comunicado di prensa, Minister di Finanzas y Cultura, Xiomara Maduro, a informa cu el a haci entrega di cuenta anual di aña 2019 na Algemene Rekenkamer Aruba (ARA), despues di realisa cambionan importante.
Minister Maduro a splica cu e cuenta anual di 2019 a conoce retraso pa motibo cu “e ta contene cambionan importante pa asina por forma e fundeshi necesario pa por haya un declaracion di accountant riba e cuenta anual di aña 2026.”
Director di Departamento di Finanzas, Sr. Derrick Werleman, a brinda un splicacion cu e cambionan mas importante ta entre otro cu cuenta anual 2019 ta contene e resultado di e ‘nulmeting’ cu a ser realisa pa Centrale Accountantsdienst CAD y tambe ta contene e cambionan den balans a causa di e ‘balansverschoning’ cu a tuma luga den aña 2019. E balans ta conoce un otro particion y presentacion ya cu por ehempel ta saca afo e ‘verjaarde vorderingen.’
Minister Maduro a remarca cu e cambionan aki a causa retraso den e trabounan pa finalisa e cuenta anual di 2019, pero ta cambionan cu tabata necesario y cu ta brinda e base cu lo yuda pa e cuentanan anual di pais Aruba den futuro cercano por conta cu un ‘accountantsverklaring’ cu ta certifica cu e cifranan presenta y cu a wordo compila ta real y ta conforme e standardnan internacional di raportahe.
E comunicado di e mandatario ta finalisa resaltando cu lo sigui dirigi e esfuersonan pa e cuenta anual di aña 2026, conforme palabracion den e protocol di aña 2018 entre Aruba y Hulanda, por ricibi un declaracion di Stichting Overheidsaccountantbureau SOAB cu por certifica cu e cifranan den e cuenta anual di 2026 ta corecto y ta duna un bon bista di locual a pasa den e aña ey.
