Diahuebs 23 di november, Minister Arends a tene un conferencia di prensa encuanto e campaña di conscientisacion nacional “Limpi Limpi”, en particular e actividad Baki den Bario. E iniciativa di Baki den Bario ta fomenta un comportacion consciente den nos comunidad, unda tur persona ta aporta den e proceso di separacion di desperdicio pa promove un maneho mas responsabel di e desperdicio cu nos ta produci.

Ta haci un yamada na comunidad residencial henter pa e ultimo tres baki den bario nan pa 2023. Esaki lo tuma luga den districto di Noord diasabra awor 2 di december 2023 na Veld di Bubali. Otro siman 9 di december 2023 na Santa Cruz na Stadion Nadi Croes y Crismo Angela. Pa clausura e exitoso Baki den Bario, lo tin e ultimo accion diasabra 16 di december 2023 na San Nicolas, unda e bunita proyecto a cuminsa. Minister Arends ta enfatisa cu e orario di tur accion di Baki den Bario ta 7’or te cu 11’or di mainta. Pa e schedule completo di Baki den Bario, por acudi na e website di Limpi.aw

Mirando e exito di e iniciativa di Baki den Bario, a amplia e cantidad di tipo di desperdicio cu por trece pa wordo procesa, entre otro, taira, carton y azeta di cushina uza alabes di e-waste, metal, desperdicio di construccion, green waste y bulk/mix waste. Prepara bo desperdicio separa pa facilita e fluho na e sitio. No lubida di colecta bo azeta di cushina uza den botter di plastic uza, cu tapa cera, pa asina esaki tambe por wordo recicla.

Minister Arends a haci un aviso pa pueblo, cu no ta acepta asbest durante e accion di Baki den Bario. Pa desperdicio di asbest tin regulacion y ta rekeri permiso di DTI pa deshaci de esaki apropiadamente. Treciendo esaki na Baki den Bario ta trece consecuencia di salud inmediato pa esnan cu ta labora na Baki den Bario y tur den cercania.

Durante e conferencia di prensa Minister Arends a haci uzo di e oportunidad pa recorda comunidad cu Fundacion pa nos Comunidad tambe ta na Baki den Bario. Fundacion Pa Nos Comunidad (FPNC) ta acepta diferente tipo di articulo entro otro comestibel, mueble y paña. Pa temporada di Pasco FPNC a lansa nan campaña unda nan ta colectando diferente producto di cuminda pa traha macuto di cuminda y yuda famianan den necesidad. Por haya mas informacion riba nan pagina di Facebook, via nan website fpnc.aw of puntra y haci bo donacion personalmente cerca nan durante Baki den Bario.

E helpdesk di Serlimar tambe lo t’ey durante tur Baki den Bario pa yuda nan clientenan.

Por ultimo Minister Arends a comparti datos colecta di Baki den Bario unda tabata tin un averahe di 500 vehiculo cu a trece nan desperdicio y a colecta alrededor di 70 pa 75 baki cada bes.

E proximo accion di Baki den Bario lo tuma luga na Veld di Bubali di 7’or te cu 11’or di mainta unda Bureau City Inspector lo ta presente pa guia cu e separacion di desperdicio ta wordo haci corectamente. Tene cuenta cu lo tin trafico y ta rekeri un tiki pasenshi.

“Nos ta wardabo na Baki den Bario na Veld di Bubali y ta conta cu bo ayudo pa tene Aruba limpi limpi!” – Minister Ursell Arends