Tene relacion sexual cu consentimento di un menor di edad entre 12 y 16 aña di edad ta un delito penal, ni cu cuanto argumento purba trece dilanti manera e persona no tabata sa e edad, e mucha mes tabata kier, e mucha ta parce un adulto of e argumento cu mayoria bes ta wordo usa cu e mucha mes a busca, e ta keda un violacion sexual y ta considera como un delito penal segun articulo 2:200 di codigo Penal di Aruba.

Articulo 2:200 di codigo Penal di Aruba
 Pa un kende cu a yega na e edad di 12 aña pero cu ainda no a yega na edad di 16 aña, pafo di matrimonio, ta comete actonan sexual cu ta inclui penetracion sexual den curpa di otro persona, ta considera como un delito penal den articulo 2:200 di codigo Penal di Aruba, lo por condena cu un castigo maximo di 8 aña di prison of un multa categoria 5.

Argumento presente como defensa di ley di violacion sexual 2:200
E articulo aki 2:200 di nos Codigo Penal di Aruba a ser traha di tal forma pa proteha menor di edad contra e tipo di contactonan sexual pa motibo cu menornan di edad entre 12 pa 16 aña di edad nan habilidad pa haci evaluacion riba e consecuencianan di tal actonan no ta desaroya of no a desaroya suficientemente ainda.

Un otro argumento presente como defensa di ley di violacion sexual 2:200 di Codigo Penal di Aruba ta relaciona cu e dificultad pa un condena den caso di violacion (contra un victima di cualkier edad) den corte. Pa esaki, caso di violacion sexual forsa cu un menor ta ser considera como un forma particularmente di violacion pisa y e ley aki ta alivia Ministerio Publico for di e peso di prueba pa falta di consentimento di e victima. Esaki ta haci cu condenanan ta mas frecuente den casonan cu envolvi victimanan menor di edad.

Un otro rason ta resulta for di e hecho cu menor di edad generalmente ta inferior economicamente, socialmente y legalmente compara cu adultonan. Ta ilegal pa un adulto tin relacion sexual cu un menor, ley di violacion sexual 2:200 di Codigo Penal di Aruba ta trata di duna e menor algun proteccion contra adultonan cu tin un posicion di poder riba nan.

Victima menor di edad y sospechoso menor di edad
 Den caso di delitonan sexual cu un victima menor di edad y e sospechoso tambe ta menor di edad, e demandanan di castigo ta depende di e fase di desaroyo di tanto e victima como e sospechoso, e diferencia di edad entre e victima y e sospechoso, e grado di consentimento (si of no y na ki grado nan a consenti), ademas di e grado di igualdad entre personanan envolvi. Den caso di delitonan sexual cu sospechosonan menor di edad na Aruba, ta tuma luga semper un consulta cu e fiscal (jeugdofficier) tocante e demandanan di castigo.

Caso di un DJ/MC di 31 aña y su victima di 14 aña na Aruba
 Dia 1 october e victima su tata tabatin un fiesta na su bar, e victima tabata na e bar anochi ey. Un grupo di musica a toca prome cu e disk jockey di fam J. a cuminsa toca musica.

E DJ a duna e victima su number di telefon despues di esaki. Mas o menos 04:30 am e victima a ricibi un mensahe di Whatsapp di e Dj. E tabata puntra e victima unda e tabata. E victima a contesta e DJ cu e tabata caminda pa cas. E DJ a puntra e victima si e kier sali cune. E victima a bisa e DJ “cu mi mama no lo duna mi permiso pa sali asina laat”. E victima a bisa e DJ despues cu e lo por warda te ora su mama bay drumi y despues e por topa cu e DJ. E DJ a bisa e victima pa manda su location p’e pa e por pasa busc’e.

Mas o menos 04:56 AM e DJ a pasa busca e victima na cas y di eynan el a hiba e victima na e apartamentonan banda di e IMSAN na San Nicolas. Caminda pa e apartamentonan e victima a puntra e DJ cuanto aña e tin, e DJ a contesta e victima cu e tin 31 aña y el a bisa na e DJ cu e tin 14 aña, e DJ a bira puntra e victima si e tin’e den serio cu e tin 14 aña y e victima a contesta cu si.

E DJ no tabata preocupa pa e edad di e victima. E victima a mira e DJ ta dunando placa na un hende for di un bentana y e DJ a bisa e victima cu e la paga pa un apartamento. Nan a drenta un camber y e DJ a subi riba e victima y a cuminsa sunchi’e riba su boca, DJ a sigui cu relacion sexual cu e victima y e no a usa condom. Ora e DJ a caba e la baha e victima na su cas back. E victima a bolbe topa cu e DJ e siguiente dia, diamars. El a pasa busca e victima mas o menos 02:30 na cas y a hib’e na su propio cas un e DJ ta biba, eynan el a sigui tin relacion sexual cu e victima na su cas.

DJ/MC ta wordo condena riba articulo 2:200 di codigo Penal di Aruba
 E DJ a conoce su victima na bar di su tata unda e tabata DJ, despues e mesun anochi, e victima a bay di acuerdo y el a hib’e pa un apartamento. Durante e encuentro aki, e DJ a comete actonan inmoral contra e victima, actonan sexual cu ta inclui penetracion.

E legislador a desea pa proteha menor di edad contra tipo di contacto sexual di e manera aki, pasobra nan capacidad di evalua e consecuencianan di actonan manera esaki no ta suficientemente desaroya, pero tambe pa motibo cu e mayor di edad mayor parti di biaha tin un superioridad riba menor di edad.

E aspectonan cu e DJ a menciona, manera cu e victima ainda tabata cana rond laat den e bar y segun su puntonan di bista, e tabata mira cu e victima tabata parce mas grandi cu 14 aña, no por traha na su fabor.

Aparte di esaki, e DJ por a bay sospecha cu e victima no tabata mayor di edad. E victima a bisa e DJ cu su mama no lo duna nan permiso pa keda asina laat. E declaracion aki cu e DJ ta pone den disputa ta ser confirma pa un mensahe di Whatsapp entre e sospechoso y e victima, unda e skirbi:

“Mi tin cu ta 100% sigur mi mama ta drumi pa mi por sneak out”.

Corte ta conta cu e acto aki a tuma luga pa motibonan oportunista y influencia di bebida alcohol, unda e DJ a haci uso di e debilidad di e victima mirando cu e victima tabata un fanatico di e Dj.

Un circunstancia cu a subi e castigo di e DJ ta cu no a usa condom, poniendo asina e victima na riesgo di un posibel embaraso no desea. E victima a declara cu e riesgo aki a ser realisa cu un abortus ilegal cu risico hopi halto, tambe e DJ tabata consciente y tabata bon na altura cu e victima tabata menor di edad unda e DJ a manda un Whatsapp cu ta cita lo siguiente:

“E unico problema ta cu bo tin 14 aña” y “Pero tog mi kier tin bo den mi brasa”.

Nota di redaccion: Den e caso specifico aki e DJ/MC a wordo condena pa 18 luna di prizon Top of Form