Manera ta conoci, Aruba y Hulanda ta den negociacion pa loke ta trata e ley di supervision financiero, esta LAft. Pa basta tempo caba e negociacionnan ta andando y Aruba y Hulanda no tabata logra yega na un acuerdo. Hulanda tabata insisti riba un rijkswet pa e supervision financiero, pero Aruba tabata completamente contra esaki y pues a keda di negocia un solucion hibrido cu tur dos partido por ta di acuerdo cune.

Ayera ariba e portal di noticia local NoticiaCla, por a tuma nota di un publicacion den cual Secretario di Estado Hulandes, Alexandra van Huffelen lo a confirma cu Hulanda y Aruba a yega na un acuerdo pa un ley di supervision financiero, LAft adapta pa Aruba den 2024.

E portal ta indica cu den un entrevista cortico cu Secretario di Estado Hulandes a confirma esaki. “Mientras cu detaye specifico no a wordo duna, den un contesta specifico na NoticiaCla, e secretario di estado a confirma si cu e tres punto cu Hulanda a pone como condicion na ultimo momento, tambe a keda incorpora den e ley ‘nobo’” e portal a señala.

Segun Van Huffelen bisa na Noticiacla, e adaptacion di e LAft ta algo cu Hulanda por ‘biba cune’ por lo pronto, pero a pesar di esaki, Hulanda ta keda insisti cu mester di un Rijkswet pa supervision financiero, pero ariba e tema aki no tin acuerdo.

E portal a agrega cu e Secretario di Estado Hulandes a clarifica tambe cu e adaptacion ta pa e LAft y no pa e protocol.

Team di Bon Dia Aruba a acerca Prome Minister, Evelyn Wever-Croes, pa confirma si e informacion aki ta corecto. “Nos no a haya confirmacion di Den Haag ainda. Asina cu tin confirmacion mi ta informa,” Prome Minister a bisa.

Durante un conferencia di prensa anteriormente, Prome Minister a remarca cu ta hopi importante pa e ley bay Parlamento di Aruba pronto, pasobra un di e condicionnan pa Aruba por yega na un interes mas abao ta cu mester aproba e ley di LAft prome cu dia 1 di januari y e normanan mas actualisa mester ta inclui den e ley.

El a splica cu no a cambia e ley aki mas desde 2015 cu el a drenta na vigor. El a indica cu nan a purba trece cambio na esaki na 2018/2019, pero no a logra cambi’e y e normanan cu ta inclui den e ley ta ainda normanan di 2015.

El a agrega cu mientras tanto tin normanan nobo cu ta wordo aplica caba y cu, segun el a indica, Gobierno di Aruba ta teniendo su mes na dje, pero mester hancra e normanan aki den e ley.

Den luna di october, Prome Minister a biaha pa Hulanda pa atende e reunion di Conseho di Minister di Reino unda tabatin riba agenda e cambionan di Ley di Supervision Financiero di Aruba, LAft. cual el a presenta, pero cu Hulanda a rechasa y a propone tres condicion nobo.

Den declaracionnan na prensa Hulandes, Wever-Croes indica cu tabata na ultimo momento cu Hulanda a propone e tres condicion nobo aki.

E prome condicion ta tocante maneho financiero, unda ta pidi minister di Finanzas pa duna informacion adicional di maneho financiero. E di dos ta e palabracionnan cu Aruba mester haci cu Colegio di Supervision Financiero (CAft) riba e tema di gastonan di personal prome cu e ley drenta na vigor. Y e di tres condicion tin di haci cu proyectonan PPP.

Dia 10 di october e debe di COVID-19 a vence y Aruba a firma un acuerdo di refinanciamento cu Hulanda na un interes di 6.9%, un interes cu Prome Minister a expresa, na mas di un ocasion, ta un interes demasiado halto pa Aruba y gobierno no ta di acuerdo cune, pero mester a firma.

E posibilidad di reduci e interes di e acuerdo di refinanciamento aki ta mara na e acuerdo pa e ley di supervision financiero, LAft.

E negociacionnan entre Aruba y Hulanda ta andando pa lunas y den esaki Hulanda a duna Aruba dos opcion. Un opcion tabata cu por refinancia e debe cu interes di mercado, of e otro opcion ta cu si Aruba kier un interes mas abao, mester cumpli cu condicionnan, entre otro acepta un rijkswet pa supervision financiero.

Anteriormente Parlamento di Aruba a indica cu no ta sostene e rijkswet aki, esta RAft y a pasa un mocion cu mayoria di parlamentario a sostene pa trek in e RAft, pasobra segun nan, e lo perhudica e crecemento y economia di Aruba.

Gobierno di Aruba a sigui e ora cu otro alternativa, cual ta e alternativa hibrido cu ya Gobierno di Aruba a presenta na Hulanda, den cual algun aspecto ta wordo regla den e rijkswet y algun aspecto den e landsverordening mes pa asina purba acomoda ambos banda, tanto Parlamento di Aruba como Hulanda den e discusion aki.

E meta di Gobierno di Aruba ta pa prome cu 1 di december yega na un acuerdo pa asina e interesa di e refinanciamento por baha mas compara cu aworaki.

Manera ya caba menciona, Van Huffelen a confirma, segun e portal NoticiaCla, cu a yega na un areglo pa cu e cambionan den e LAft pa e supervision financiero pa Aruba den 2024, pero te cu aworaki Gobierno di Aruba no a ricibi confirmacion oficial for di Den Haag cu a acepta e propuesta aki.

Mester remarca cu falta solamente algun dia pa e fecha 1 di december yega y pues ainda mester manda e ley nobo aki Parlamento di Aruba pa trata e ley y wak si Parlamento ta sostene esaki tambe.