Ayera, reaccionando na e noticia di e caso penal contra ex-minister di Transporte, Comunicacion y Sector Primario Chris Romero, a yega na mesa di redaccion di Bon Dia Aruba cuestionamento tocante e maneho den seno di Partido MEP, cu awo ya a resulta den dos caso di posible hechonan castigable.
Mientras cu ainda Romero ta un sospechoso, Ministerio Publico si a informa cu a detene E. Koolman amigo, man drechi y ex-coordinador di Romero.
Investigacion a cuminsa na februari 2021 cu entradanan hudicial bao guia di hues-comisario cu a tuma luga na varios adres relaciona cu e investigacion di algun contract di servicio cera door di ex-minister Chris Romero, tempo cu e tabata den su funcion como minister. E zoekingnan a tuma luga na cuatro adres unda a bay cu administracion di compania, computer y varios hard disk cu ta elementonan crucial pa e investigacion di Landsrecherche.
Ta un investigacion tocante acuerdonan di servicio (dienstverleningsovereenkomsten) den e periodo 2017-2021 cu a wordo cera cu varios persona huridico (rechtspersonen). Ayera e ciudadano E. Koolman a keda deteni y un rato despues, Landsrecherche a lag’e back den libertad pa motibo di circunstancianan personal cu a surgi, manera Ministerio Publico a informa. Sinembargo, E. Koolman ta sigui como un di e sospechosonan principal den caso Kwihi.
Mirando cu Romero tabata minister den Gabinete Wever-Croes I, di 2017 pa 2021, ta cuestiona e hecho cu un partido cu ta para asina fuerte pa Integridad ta bin ta carga cu dos caso di conducta castigable. Tin tambe e caso di ex-minister Plenipotenciario, Guillfred Besaril, contra ken actualmente tin un keho penal oficial y su caso ta pendiente. Ta cuestiona e rol di prome minister, Evelyn Wever-Croes, kende tabata liderando un gobierno unda cosnan iregular y ilegal tabata tumando lugar pa hopi tempo, y su enfoke riba integridad siendo cu den su propio gobierno esaki tabata faltando.
Manera Bon Dia Aruba a reporta, Aruba tin record den reino pa politiconan condena pa hechonan castigabel. Na Aruba: Na e momento aki tin 4 politico condena penal pa corupcion.
Partido AVP: Na e momento aki tin 3 condena pa corupcion.
Partido POR: Na e momento aki tin 2 politico condena pa corupcion y 1 sospechoso di husticia na e momento aki den caso Flamingo.
Partido MEP: Tin 1 sospechoso di husticia na e momento aki cu ta den caso Kwihi y oficialmente tin un keho penal contra ex-minister plenipotenciario Guilfred Besaril segun Ministerio Publico a confirma.
