Ministerio Publico a pidi 5 aña di prizon pa sospechosonan R. Laveist, R. Stamper y I. Sarmiento del Ponte pa contrabanda di persona cu consecuencia fatal di Leidy Johana Salazar y contrabanda di Sarmiento del Ponte su yiu muhe na unda cu autoridadnan a haya documentonan di identificacion riba boto ora a coy e boto den beslag.

Investigacion (YOHANA) Feit 1

E caso (YOHANA) ta trata di e dama di nomber Leidy Johana Salazar, un Venezolano cu segun Ministerio Publico ta victima di contrabanda di persona (Mensensmokkel) cu consecuencianan fatal dia 22 di maart 2023 ora el a sali cu boto for di Puerto Escondido, Venezuela caminda pa Aruba, pero nunca el a yega. Den e caso proforma solamente R. Stamper y R. Laveist tabata sospecha di ta envolvi.

Investigacion (SALACIA) Feit 2

Durante tratamento di e caso proforma dia 19 di october 2023, Ministerio Publico ta anuncia otro caso nobo denomina (SALACIA) ora cu durante cu a coy e boto di R. Stamper den beslag pa e caso (YOHANA) nan a haya 6 ID y paspoortnan di personanan cu Ministerio Publico ta sospecha di a ser transporta ilegalmente for di Venezuela pa Aruba incluyendo e yiu di e sospechoso nobo Sarmiento del Ponte, ta sospecha cu e trio aki a comete e hecho castigabel di contrabanda di persona (Mensensmokkel) dia 22 di november 2022 unda Sarmiento del Ponte a trece su yiu for di Venezuela ilegalmente.

Geheim Audio Cura Cabai

Bon Dia Aruba riba su Facebook page dia 14 di november 2023  a publica un audio secreto cu a yega na nos mesa di redaccion, a reunion ey a tuma luga na pier di Cura Cabai tres dia despues di e desaparicion di Leidy Johana Salazar, den dje por scucha e sospechosonan, R. Stamper y R. Laveist incriminando e sospechoso Sarmiento del Ponte ken oficialmente awor tambe ta bira sospechoso den e caso (YOHANA), ademas, den e declaracion di R. Laveist riba e audio secreto nan ta clarifica cu a transporta Sarmiento del Ponte su yiu ilegalmente for di Venezuela pa Aruba, un otro persona di nacionalidad Peruano bou di nomber Evelyn di e cual su documentonan y di otro 4 persona mas a ser haya riba boto di R. Stamper ora cu e la wordo confisca.

Ministerio Publico requisitoir

Segun Ministerio Publico pa 7.30 di mainta di dia 22 di maart 2023, R. Stamper ta topa cu ‘Segundo’ un capitan di boto di Venezuela cu a trece Johana for di Puerto Escondido y nan a topa den awa teritorial di Venezuela mes pa asina ey preveni cu e radar di Kustwacht por mira e botonan haci contacto cu otro, akinan Segundo ta pone Johana riba un boei y tira e na awa unda R. Stamper a pasa recoge Johana.

E contacto entre e boto di R. Stamper y Segundo a dura solamente 3 minuut segun e radar di Kustwacht, Kustwacht tabata warda unda nan tabata tin un bista riba dje ora e tabata 1.3 kilometer for di costa di Aruba y no a wak Johana riba boto, Ministerio Publico a conclui cu Johana lo a bula for di boto y a fayece a consecuencia di esaki y no ta manera e man overboard alarm di e sistema di GPS cu tabata indica cu ta 104 meter for di costa di Aruba Johana a bula.

Segun punto di bista di fiscal, e crimen di contrabanda di Johana cu consecuencia fatal aki a wordo cometi den participacion di e sospechosonan ‘in vereniging’ cu R. Stamper, R. Laveist, Sarmiento del Ponte, Ficky y Segundo unda tabatin planificacion y transaccion financiero na un suma di 2.100 dollar, ademas tabatin ehecucion di e hecho castigabel di contrabanda di persona (Mensensmokkel) cu consecuencia fatal.

Segun Ministerio Publico tabatin planificacion entre R. Laveist y Sarmiento del Ponte pa e fecha cu ta bay trece Johana y e transaccion financiero di 2.100 dollar tabata entre R. Laveist y Ficky y e ehecucion di hecho castigabel ta Segundo ken a transporta Johana for di Puerto Escondido pa topa R. Stamper ken na su turno a transporta Johana pa Aruba.

Den esaki, R.Laveist tabata warda na pier di Colony pa Johana, hasta el a logra saca un potret di Kustwacht na momento cu nan tabata controla e boto di R. Stamper. Ademas, durante un entrada hudicial dia 23 di April 2023 a haya Johana su pertenencianan, entre otro, paña, den e bahul di auto di R. Laveist. Tambe Ministerio Publico a haya conversacion di Whatsapp entre R. Laveist y Sarmiento del Ponte tocante ki dia Johana ta bay bin Aruba.

Defensa di sospechosonan

R. Laveist ta nenga tur cos den e caso y sospechonan di (YOHANA) Feit 1, e defensa ta acepta cu tabata tin discusion y mediacion y a busca Johana su pañanan, pero ta nenga completamente cu e la regla of plania e transport pa Johana y tambe ta bisa cu no ta su persona ken a laga Johana bula na awa, tampoco no tin prueba cu Johana ta morto segun R. Laveist pa motibo cu no a haya e curpa di Johana.

Den caso y sospechonan di (SALACIA) Feit 2 segun R. Laveist no tin ningun prueba y ta nenga completamente cu e tabata envolvi den transportacion Sarmiento del Ponte su yiu.

Sarmiento del Ponte den caso y sospechonan di (SALACIA) Feit 2 ta nenga di ta envolvi den tur caso, na unda e ta cambia su declaracion na polis, na prome instante e ta declara cu ta R. Laveist a yuda su yiu pa drenta Aruba ilegalmente, pero despues e ta hala su declaracion y ta bisa cu e no sa nada.

Den e caso y sospechonan di (YOHANA) Feit 1 Sarmiento del Ponte ta distancia su mes atrobe y ta nenga cu tin algo di haber pa motibo cu el a entrega su mes boluntariamente segun su defensa.

R. Stamper den e caso y sospechonan di (YOHANA) Feit 1 ta acepta cu e la busca Johana y transporte pa Aruba, pero no ta acepta e castigo di mas pisa pa motibo di e citacion di Ministerio Publico “door di e hecho castigabel (mensensmokkel) Johana a fayece,” segun Stamper su opinion, Ministerio Publico no por prueba cu Johana ta morto y ta Johana mes a dicidi di bula for di boto, segun Stamper e la duna Johana un bon vest pa e por drief.

Den caso y sospechonan di (SALACIA) Feit 2 S. Stamper su declaracion ta cu e documento nan cu a haya den su boto, ta di personanan cu a wordo deporta for di Aruba y e la haci e fabor di hiba e documentonan na otro personanan na Bajo, un luga den awanan teritorial di Venezuela

Contrabanda di persona (Mensensmokkel)

Contrabanda di persona, ta un termino usa pa describi circunstancianan unda ilegalmente y di forma organisa ta trafica persona a traves di fronteranan internacional. No solamente e ta castigabel na nivel internacional sino na Aruba tambe, unda e ta hancra den Art. 2:154 di Codigo Penal di Aruba. Den esaki e castigo por varia di 4 aña di prison, multa di categoria 4 te cu 15 aña di prison of multa di categoria 5 si e trafico di persona tin como resultado e morto di e persona.

Sospechosonan deteni na Venezuela pa caso di Leidy Johana Salazar

Den esaki, nan a logra e identificacion y detencion di Edirso Segundo Colina Rodríguez di 42 aña, ken tin dos registro pa delito di contrabanda; José David Colina Borges di 25 aña; José Daniel Colina Borges tambe di 25 aña; Alcides Rafael Lugo Martínez di 24 aña y Eudomar José Arias Guanipa di 30 aña; R. Stamper y R. Laveist tambe ta profugo di husticia Venezolano pa e caso specifico di Leidy Johana Salazar y mas caso cu durante investigacion a sali na cla. E orden di captura contra e Arubianonan ta keda vigente.

Nota di redaccion:

Pa dia 13 di december , 8.15 di mainta lo tin sentencia. Tanto e capitan ‘Segundo’ como y Ficky ta deteni na Venezuela pa e caso di Johana.