(AP)—E parlamento nobo di Polonia a cuminsa debati e reestablecimento di fondo gubermental pa fertilizasion in vitro (IVF) como su prome legislacion siguiendo e eleccionnan den cual e partido conservativo cu a prohibi esaki a perde control di e legislatura.
Miembronan di e mayoria centrista nobo a bisa cu e tabata simbolico pa cuminsa nan termino cu trabao pa trece un fin na e prohibicionnan introduci pa e gobierno derechista. “E reestablecimento di fondo pa IVF ta e prome decision pa e mayoria democratico,” segun un di su legislado, Agnieszka Pomaska.
E fecha di e voto final riab e programa, calcula na 500 miyon zlotys (125 miyon dollar) un aña, no tabata conoci inmediatamente. E legisladonan a subraya cu miles di parehanan sin yiu den e nacion di 38 miyon residente tabata wardando pa e regreso di e apoyo di gobierno pa IVF. Fondo di estado a ser introduci na 2013 pa un gobierno liberal lidera pa Donald Tusk, pero e gobierno conservativo a prohibi esaki na 2016 den un di su prome movidanan, bisando cu e procedura envolvi ta destrui embryo humano.
Aproximadamente 22,000 mucha a nace durante e existencia di e programa, segun e cifranan di e Ministerio di Salud. Mas cu 1,000 mucha a nace desde cu e proceduranan IVF a ser conduci pa prome biaha na Polonia na 1987. Un propuesta civil buscando pa reestablece fondo a ser pone riba pausa pa e partido Ley y Husticia na comienso di aña. Hopi legisladonan di e partido a bandona e camara durante e discusionnan diaranson pa demostra nan dessatisfaccion.
Sinembargo, un ayudo pa Presidente Andrzej Duda, ken ta un aliado di Ley y Husticia, a bisa cu Duda probablemente no lo uza su poder pa veto contra e reestablecimento pa fondo estatal pa IVF. Un coalicion di partidonan pro Union Europeo a gana un mayoria di e asientonan den e eleccion luna pasa y a cuminsa traha pa anula algun di e leynan cu nan ta considera restrictivo. Un coalicion di gobierno nobo lidera pa Tusk ta espera di ta cla mey december, pero Duda a duna Ley y Husticia e prome chens pa forma e gabinete.
