(AP)—Dos hende cu a ser acusa di opera un burdel cu clientenan rico na Massachusetts y Washington D.C. cu lo keda deteni pa awo, segun un hues a bisa diaranson.
Abogadonan pa Han Lee y Junmyung Lee a acorda na un orden boluntario di detencion durante un reunion den corte dos siman despues di nan detencion. Magistrado Hues David Hennessy na Worcester, Massachusetts, a duna e orden sin prehuicio, cual ta nifica cu defensa por move nan libertad pa un otro dia.
Autoridadnan a bisa cu e burden comercial na Massachusetts y Virgina a provee servicio na politiconan, ehecutivonan di compania, agentenan militar, abogadonan, profesornan y otro cliente cu bon conexion. Fiscalnan no a nombra ningun cliente publicamente y nan no a haya carga tampoco. Pero abogado di estado Josh Levy a bisa cu e investigacion ta andante y cu fiscalnan ta comprometi pa duna esnan cu a organisa e skema, como tambe esnan cu a contribui na e demanda, responsabilidad pa nan accion.
Fiscalnan a argumenta cu Han Lee y Junmyung Lee tin chens pa huy for di e pais, subrayando nan recursonan financiero y falta di conexion cu e comunidad. Un agente di Homeland Security Investigations a declara den documentonan di corte entrega diaranson cu autoridadnan ta kere cu Han Lee a gana un suma “sorprendente” como lider di e operacion.
Esaki tabata opera uzando websitenan cu falsamente ta adverti modelonan Asiatico sunu pa fotografia profesional, manera fiscalnan ta alega. E operadonan a rent apartamentonan di luho pa uza como burdel na Watertown y Cambridge, Massachusetss, y Tysons y Fairfax, Virginia.
Autoridadnan ta bisa cu Han Lee a recluta muhenan y a mantene e websitenan y burdelnan. El a paga Junmyung Lee, ken tabata un di su empleadonan, entre 6,000 cu 8,000 dollar efectivo pa luna den intercambio pa su trabao registrando afspraak pa e clientenan y treciendo muhenan na e burdelnan, entre otro cos, segun e agente a skirbi den e declaracion.
Fiscalnan ta kere cu operadonan a gana centares di dollar via e netwerk, unda cliente a paga te cu 600 dollar pa ora pa servicionan. Oficialnan ta bisa cu Han Lee sconde mas cu 1 miyon dollar den ganashi for di e operacion por medio di converti e placa den ordonan di placa, entre otro cos, pa haci cu esaki por mustra legitimo.
Autoridadnan a confisca for di nan apartamentonan placa, bukinan detayando actividadnan di e burdelnan y telefon cu kisas por ser uza pa comunica cu e clientenan, segun documentonan di corte. E agente a skirbi cu investigadonan na cas di Han Lee tambe a descubri obhetonan indicativo di su “habitonan di luho y gastamento”, incluyendo sapatonan y tasnan di luho.
Un tercer persona cu carga den e caso, James Lee, a ser deteni na California y a ser ordena pa un hues pa keda deteni mientras cu e ta warda huicio. Ainda e mester aparece dilanti corte na Massachusetts.
