(AP) – Prins Harry su batayanan cu e noticieronan Britanico ta tumando un otro caminda for di corte di London na e gobierno mientras e ta busca evidencia pa un pregunta di decadanan atras cu ta central pa su demanda di hacking contra Daily Mail segun su abogado a conta diamars.
E Duke di Sussex y celebridadnan manera Elton John y actor Elizabeth Hurley ken ta demandando Associated Newspapers Ltd. kier usa documentonan cu a ser revela confidencialmente na un gobierno tocante scandal cu ta trata reporteronan cu tabata vigila voicemail di celebridadnan, politiconan y te hasta victimanan di asesinato.
Un abogado pa Harry y otro celebridadnan a bisa cu e lo pidi ministernan di gobierno retira of haci un amienda na un ordo anterior cu ta restringi e publicacion di e recordnan di pago na detectivenan priva cu aparentemente a mishi cu celularnan y a usa dispositivonan ilegal pa por vigila su clientenan. E corantnan ta nenga e acusacionnan aki.
Anteriormente e luna aki, Husticiero Matthew Nicklin a rechasa Mail su intento di descarta e caso sin un huicio, pero tambe a declara cu nan no por usa evidencia cu a leak for di e peticion. E Hues a bisa cu e pagonan mester ser otorga bao confidencialidad y pa e motibo aki no por ser usa sin un cambio den e ordo cu ta restringi su revelacion.
E demanda aki ta uno di varios cu Prins Harry a trece dilanti den su mision personal contra e noticieronan aki cu ta enfoca mas riba farandula. E ta tira culpa na media pa e fayecimento di su mama, Prinses Diana, ken a fayece den un accident na Paris den aña 1997 ora cu e tabata ser persigui pa paparazzi. Tambe e ta bisa cu e prensa agresivo a causa cu su persona y su pareha Meghan a bandona nan responsabilidadnan real y a muda bay Merca.
