Caso penal contra ex-minister di Transporte, Comunicacion y Sector Primario Chris Romero ta den full swing unda a sigui scucha sospechosonan y tambe varios testigo caminda no por descarta mas detencion. Ayera a detene E. Koolman amigo, man drechi y ex-coordinador di Romero pero oranan despues a keda den libertad pa motibo di circunstancianan personal segun Ministerio Publico.
Investigacion Kwihi
Investigacion a cuminsa na februari 2021 cu entradanan hudicial bao guia di hues-comisario cu a tuma luga na varios adres relaciona cu e investigacion di algun contract di servicio cera door di ex-minister Chris Romero, tempo cu e tabata den su funcion como minister. E zoekingnan a tuma luga na cuatro adres unda a bay cu administracion di compania, computer y varios hard disk cu ta elementonan crucial pa e investigacion di Landsrecherche.
Ta un investigacion tocante acuerdonan di servicio (dienstverleningsovereenkomsten) den e periodo 2017-2021 cu a wordo cera cu varios persona huridico (rechtspersonen). Ayera e ciudadano E. Koolman a keda deteni y un rato despues, Landsrecherche a lag’e back den libertad pa motibo di circunstancianan personal cu a surgi, manera Ministerio Publico a informa. Sinembargo, E. Koolman ta sigui como un di e sospechosonan principal den caso Kwihi.
Sospechosonan principal den caso Kwihi
Den e caso Kwihi na e momento aki tin 3 sospechoso principal, cu ta ex-minister Chris Romero, E. Koolman y un otro dama identifica como M.S. Maduro, kende ta aparece riba e pagina di Camara di Comercio di Aruba como propietario di e compania MADBOR CONSULTANCY. E compania aki a fungi manera un uitzendbureau pa ex-mandatario y ta sospecha cu a ricibi placa fraudulentamente di Pais Aruba via e construccion aki. Tambe Ministerio Publico ta investigando si e placa cu e personanan aki – Koolman cu Maduro – a usa pa cumpra un corant digital cu ta riba mercado di Aruba, ta bin for di actonan castigabel. Si esaki ta e caso, e lo por cambia completamente e panorama di e investigacion.
Tambe por a compronde cu Landsrecherche a yama e otro socio di e corant digital pa e por duna su declaracion den calidad di testigo den e caso specifico aki.
Ministerio Publico a manda señal fuerte
Landsrecherche di Aruba, cu ta traha independientemente y bao autoridad di Procurador General, ta investiga desde 1993 comportamento posiblemente castigabel di (semi-) ambtenaarnan.
Un parti importante di e tarea aki ta pa bringa corupcion. Corupcion ta ataca un pilar importante di democracia, esta e confianza den gobierno.
Un ciudadano mester por confia cu ta trata cuidadosamente cu placa publico.
Un ciudadano mester sa cu ley ta conta pa un y tur y cu corupcion ta inaceptabel.
Politiconan condena pa corupcion na Aruba
Aruba tin record den reino pa politiconan condena pa hechonan castigabel, incluyendo ex-minister di Finanzas, Tico Croes bao di gabinete di Henny Eman III pa loke tabata trata Fondo di Desaroyo Nobo San Nicolas su sentencia (onherroepelijk).
Ex-minister Paul Croes, cu tabata minister di Hubentud, Asuntonan Social y Labor den Gabinete Mike Eman II, tambe a keda condena penalmente den e caso IBIS pa diferente delito, manera labamento di placa, participacion den un organisacion criminal, acepta y pidi soborno y abuso di su funcion. Paul Croes su sentencia ta tambe ta onherroepelijk y na e momentonan aki ta pagando su debe cu husticia di Aruba na KIA.
Benny Sevinger, parlamentario y ex-minister di Infrastructura, Integracion y Medio Ambiente den Gabinete Mike Eman I y II, a keda condena den corte di prome instancia den e caso Avestruz pa otorgamento di tereno di gobierno y mal uso di su fundacion Curason Berde. Su sentencia ta den apelacion.
Alan Howell, ken tabata e sospechoso principal di e caso Diamante y tabata fungi como vice-presidente di Parlamento di Aruba, tambe a keda condena pa malversacion di fondo y falsificacion di documento. Aworaki su sentencia ta den apelacion. Conhuntamente cu Howell, Jacqueline van Putten, ken tabata candidato riba lista y tabata tesorera di e fundacion di fraccion di partido POR den Parlamento di Aruba, cu ta yama Blue is Love Foundation, den sentencia ta indica cu Van Putten a enrikece su mes cu Sinterklaas bonus cu e no tabatin derecho riba dje. Van putten no a apela su sentencia, loke ta hacie onherroepelijk.
Politiconan sospechoso di husticia na e momentonan aki
Ex-minister di Infrastructura y Medio Ambiente di Gabinete Wever-Croes I, Otmar Oduber, na momentonan aki ta sospechoso den caso Flamingo relaciona cu otorgamento di tereno.
Chris Romero, ex-minister di Transporte y Sector Primario di Gabinete Wever-Croes I, tambe ta sospechoso penal den e caso Kwihi pa algun contract di servicio otorga den su funcion como minister.
Y awor e caso di Guilfred Besaril, ex-minister plenipotenciario di Gabinete Wever-Croes II na Hulanda, contra ken segun ministerio publico ya caba un keho penal ta canando su caminda. Cu esaki por mira cu no ta dos minister so cu condena penalmente, manera prome minister a sigura.
Nota di redaccion:
Na Aruba: Na e momento aki tin 4 politico condena penal pa corupcion.
Partido AVP: Na e momento aki tin 3 condena pa corupcion.
Partido POR: Na e momento aki tin 2 politico condena pa corupcion y 1 sospechoso di husticia na e momento aki den caso Flamingo.
Partido MEP: Tin 1 sospechoso di husticia na e momento aki cu ta den caso Kwihi y oficialmente tin un keho penal contra ex-minister plenipotenciario Guilfred Besaril segun Ministerio Publico a confirma.
