(ElNacional/EFE) – Un solicitud reciente pa arbitrahe di e multinacional Kellogg contra Venezuela ta pone resurgi un caso den cual, segun expertonan, e pais tin tur cos pa perde. Despues di un lustro di a horta e planta di e empresa aki na e nacion, unda cu Estado ta produci, sin autorisacion, cornflakes cu nomber, logotipo y imagennan di e marcanan original.

Dia 9 di november, e Britanico Kellogg Latin America Holding Company (One) Limited, subsidario di e compania Mericano, a solicita dilanti e Centro Internacional pa e Areglo di Diferencia riba Inversionnan (Ciadi) e inicio di e procedemento.

Na 2018, Kellogg a stop su operacionnan, afecta pa e crisis na e pais, cu a cera e aña ey cu un inflacion di 130.060%, un decision despues cu esun di Nicolas Maduro, den pleno campaña presidencial, a ordena pa entrega e planta na e trahadonan pa nan sigui produci sin ningun problema.

Cinco aña despues, e productonan aki ta sigui wordo comercialisa, cu e imagennan di e personahenan tradicional di e empresa, manera e tiger Tony, e gay Cornelio y e papagay Sam, riba e cahanan, hunto cu referencianan di e gobierno, manera e frase “Hunto tur cos ta posible”, di e campaña presidencial di Maduro na 2018.

E paketenan tin e nombernan di e planta aki como usuarionan ariba rednan social, unda ta comparti informacion gubernamental. Un logotipo cu ta bisa ‘Kellogg, traha den socialismo” y contenido tocante e campaña di e referendum di 3 di december ariba e disputa cu Guyana pa e teritorio di Esequibo.

Segun e abogado Castor Gonzalez, na cualkier momento un reclamo formal lo por a tuma luga di parti di Kellogg pa motibo di e continuidad di e operacionnan cu e uso no autorisa di nan simbolonan.

“Nos ta den presencia di un suerte di cronica anuncia” e hurista specialista den propiedad intelectual a bisa EFE.

El a splica cu tras di cada marca, y principalmente den e industria di alimento, tin full un esfuerso importante di investigacion y desaroyo y di control di calidad, pues ta trata di productonan cu ta bay wordo ingeri pa un ser humano, algo altamente delicado.

“Na Venezuela, for di momento cu e poder Ehecutivo a asumi e control di e operacion ey, Kellogg no tin ningun tipo di supervision ariba esey y no tin con pa responde e consumidor pa e marcanan ey door di cual tanto el a inverti,” el a bisa.

Despues di stop operacionnan, Kellogg a adverti cu e regimen a tuma over e planta na e estado di Aragua, door di cual e no ta haci su mes responsable di e uso cu ta haci di su instalacionnan y ekiponan, di e seguridad di e operadornan ni di e calidad di e productonan.

Na 2019, el a bisa cu el lo eherce e accionnan legal pertinente pa e apropiacion di su activonan y e uso indebido di e marca.