Pakico no tin tanto… Energia renovable…?

Den nos edicion di ayera nos tabatin un articulo interesante tocante formanan alternativo di uso di por ehemplo energia solar, di un manera individualiza, unda no ta depende mas di e red di distribucion nacional di electricidad. Banda di e aspecto tecnico di e asunto, a toca e tema tambe di e poco animo cu ta existi cerca e ciudadano pa inverti den e direccion aki. Un punto di vista cu merece atencion sigur, y unda por cierto algun tempo pasa (mei 2023) nos propio Conseho Socio-Economico (Sociaaleconomische Raad; SER) a dedica un rapport na e tema aki. Nos no ta bay resumi e rapport aki, esnan interesa por haya esaki riba website di SER Aruba (ser.aw), pero si dedica atencion na algun di e asuntonan cu a trece dilanti den e estudio aki. Nos mester bisa acerca cu nos ta haya cu e entidad aki mes lo por haci mas pa nan laga nan opinion bon funda haya mas resonancia den comunidad.

En todo caso, nos por ehemplo a observa e atencion duna na e realidad economico di hopi hogar, si nos ta papia di e posibilidad di inverti den energia alternativo, manera energia solar. Pa cuminza lo mester tuma na cuenta e situacion financiero den cual hopi famia ta actualmente. Ta berdad cu den ultimo añanan panel solar y e equipo necesario pa por funciona, a bira bastante mas barata. Sin embargo, asina mes e costonan ta demasiado pa e budget limita cu e famianan di menos recurso tin. Y den esey nos no ta papia solamente di esnan cu ta cay den e categoria di pobreza, sino e grupo grandi cu tin te, ban bisa, Afl. 3.000 pa luna pa paga tur cos. Cu e ultimo cambionan den gasto di cuminda y transporte, por ehemplo, ya na e nivel aki inverti den panel solar ta un soño cu no ta bira realidad.

Cu esey ainda nos no a toca e otro obstaculonan cu un persona ta topa na momento cu nan ta interesa na haci algo. E asuntonan cu mester resolve pa yega na tin un sistema integra, cu asistencia y integracion di nos compania nacional di distribucion, por parce relativamente factible pa un persona bon informa riba e tereno aki, pero pa otro persona esaki mester ta parce manera montaña halto cu nan mester bay subi. Por ehemplo, por ta cu e instalacion electrico di e cas no ta apto pa ricibi e instalacion di energia cu mester acopla cu e red. Esaki lo significa gasto extra, y esey ta apenas cuminzando. Kico pensa di e estado di dak di cas; e ta apto pa carga e peso extra cu e panelnan ta bay trece? Y si logra resolve tur esaki, ta bin e siguiente pregunta: e cas ta bo propiedad pa bo dicidi riba bo mes cu bo ta bay pone panel solar riba dak? O ta huur bo ta huur y doño di e propiedad ta mira bo ta bin caba pa propone gasto extra pa su persona…? Di e manera aki ya nos por elimina un porcentahe basta grandi di nos poblacion cu lo no tin ni e recursonan, ni e propiedad pa cuminza algo asina. Loke ta keda anto ta e parti mas afortuna financieramente, cu por financia algo asina, tambe pasobra nan tin acceso na capital pa fia, si acaso nan mes no tin esey caba. Simplemente e gran mayoria di nos poblacion, cu por ehemplo no tin acceso na fianza pa hipoteca, no tin acceso na capital tampoco pa e tipo di proyecto aki, cu facilmente ta requeri un planificacion di amortizacion di un prestamo den siete pa ocho aña.

Tur esaki ta hiba nos na e siguiente pregunta: pakico no tin mas iniciativa pa por ehemplo stimula empresa pa nan bay den e direccion aki? Si un empresa tin su propio edificio, lo ta hopi mas factible pa nan considera algo asina, hunto cu e banco cu di tur manera nan tin caba? Realmente nos no ta mira tanto iniciativa den e direccion aki, ni tampoco di baha gasto di energia mediante mihor isolacion di edificio. E contesta ta talvez cu nos tur ta wak den direccion di… gobierno. E ta un pregunta legitimo kico nos por spera di gobierno, pasobra hasta den paisnan prospero ta gobierno ta e mero punta di lanza di e sector di energia renovable, manera na Hulanda y Alemania. Sin e programanan extenso di subsidio y un sector di servicio comercial bon desaroya, nan tampoco lo no a logra e avance grandi cu por mira den ultimo decada. Naturalmente nos por observa cu gobierno a vocifera e intencion di bay mas den direccion di energia renovable, pero den practica no tin tanto avance. Na e momento aki, ‘real time’, Aruba tin na WEB 3,5 MW di energia cu ta bin di energia solar. Esey ta net riba e capacidad instala di e parque na aeropuerto, pa no papia mes di e parque solar na San Nicolas di cual ningun hende ta ni papia mas… Ademas nos no ta avanzando tampoco cu e parti – pa hopi hende controversial – di cambio pa gas liquido envez di heavy fuel oil, cu mester limita sikiera nos ‘carbon footprint’. E promer MOU cu Eagle LNG ta data di januari 2021 y e promer shovel mester bay den tera ainda… Ta parce nos cu den e asunto aki tambe nos lo por conta cu e unico lema cu ta funciona: “Sálvese Quien Pueda”. Esun cu tin placa y gana, haci algo.