Segun un articulo publica den Worcester Telegram & Gazette ayera, ex-Senador di Fitchburg, Dean Tran a keda aresta diabierna acusa di fraude, cu autoridadnan bisando cu el a sconde entrada legitimo pa asina cualifica pa beneficio di desempleo durante pandemia, pa un total di $30,120.
A acusa Tran di 25 cargo di fraude y tres cargo di documento falso di impuesto, segun autoridadnan. El a bisa cu e ta “absolutamente no culpable” durante un audiencia breve na corte na Boston, Merca.
Tran, kende tabata compaña pa su esposa y cuatro yiu, a keda den libertad y a permitie pa keda cu su paspoort, loke ta bay permitie pa biaha hunto cu su famia di vakantie aki na Aruba, cuminsando awe diasabra.
Autoridadnan ta acusa Tran di a gana $50mil como consultant pa un compania di parti automotor, ademas di “miles di dollar” den entrada di su propiedadnan di huur na Fitchburg. Fiscal ta bisa cu el a sconde su entrada di consultant y di huur den su declaracion di impuesto federal na 2021.
Su proximo audiencia den corte ta dia 11 di januari proximo.
Den un caso separa, Tran tambe ta enfrenta cargonan di a viola ley di etica estatal, acusa di a pone su personal estatal campaña p’e den ora di trabao pa estado.
Tran, 48, un Republicano, a sirbi den Senado estatal te cu 2020, ora el a perde su campaña di reeleccion. Na 2022, el a fracasa den su intento pa tuma e asiento den Congreso di Re. Lori Trahan.
