Recientemente, Enseñansa pa Empleo a traves di un comunicado di prensa a comparti algun cifra di e servicionan cu ta duna na comunidad a traves di curso pa mehora nan oportunidadnan laboral.
Dialuna ultimo, Minister di Labor Glenbert Croes, acompaña pa demas colega minister y parlamentario, tabata presente na Enseñansa pa Empleo (EPE), na unda a tuma luga e apertura oficial di e facilidadnan completamente renoba y moderno, y e desvelo di e branding y logo nobo. E logo aki, ta representa un trapi di crecemento, direccion bay ariba cu ta significa progreso, pasobra EPE t’ey pa e desaroyo y progreso personal di e cursista. E colornan di e logo ta representa entre otro, positivismo, confiansa, lealtad y sabiduria.
Durante e ultimo añanan, por a nota cu e interes di comunidad pa bay dilanti y crece den nan trabou ta grandi. Den 2022 un total di 620 persona a tuma curso na Enseñansa pa Empleo, cu ta ofrece un diversidad grandi den tipo di curso cu ta hustamente locual e mercado laboral mester di dje. Importante pa remarca ta e hecho cu den 2023, EPE a logra drecha e oportunidad laboral di 1630 cursista.
EPE tin un variedad di cursonan disponibel pa hendenan local, internacional y di cualkier edad. E cursonan cu EPE ta ofrece ta entre otro di idioma manera Ingles, Hulandes y Papiamento, curso di Office Skills, Customer Service, Computer pa Principiante, mercadeo, administracion manera Boekhouden diferente nivel, y mucho mas. E cursonan mas gusta, ta esunnan di Waiters, Casino Dealers y e Klein Vaarbewijs, cu desde aña pasa, tin su examen practico tambe cu mester por domina, pa por logra e licencia pa maneha un boto. Mester bisa cu resultadonan di por ehempel cursistanan pa Casino Dealer, tin practicamente trabou garantisa.
Na 2022, cursistanan tabata tin e opcion pa scoge entre 19 diferente vak, pero awor na 2023, esaki a conoce un ampliacion y a yega te na 27 diferente curso. Esaki ta e motibo tambe cu EPE mester a aumenta e klasnan pa duna les, di 31 pa 64. Awe e cursistanan por gosa di localnan completamente remodela y moderno, ofreciendo nan un ambiente mas agradabel y eficiente pa por siña, segun e comunicado di prensa.
