Ayera a traves di un comunicado di prensa Minister di Turismo y Salud Publico, Dangui Oduber a anuncia e progreso di e proyecto di embeyecemento di e strip di Eagle Beach. Un proyecto cu ta core for di e rotonde di e hotel Amsterdam Manor te cu e rotonde di Alhambra Mall.
Den e comunicado Minister Oduber a splica cu e proyecto di embeyecemento ta den su fase di embeyece henter e strip di Eagle Beach den cuadro di e mehoracion di producto Aruba. E proyecto lo percura tambe pa uniforma e paisahe cu flor- y piedranan blanco, mas bari di sushi pa henter e strip por keda mas organisa y miho structura pa un experiencia mas agradabel pa tanto e bishitantenan y como e localnan.
El a indica cu e proyecto aki ta un colaboracion entre Tourism Product Enhancement Fund (TPEF), Aruba Tourism Authority (ATA), DOW y conhuntamente cu tur e general managers di e propiedadnan hotelero cu a compromete nan mes pa haci e mantencionnan necesario den futuro.
E area turistico aki, a pesar di esfuersonan pa embeyece e area, ta keda cu un nubia preto riba dje, cual ta e holor sumamente desagradable di awa sushi pa motibo di e planta di Rioolwaterzuiveringsinstallatie (RWZI) Bubaliplas.
E situacion di RWZI Bubaliplas ta uno cu pa hopi tempo caba ta afecta e area turistico aki fuertemente y cu tambe tin posibel consecuencianan bacteriologico y di contaminacion debi na un Bubaliplas disfuncional cu ta un peliger potencialmente importante pa e pueblo di Aruba, economia y naturalesa.
E noticia di e proyecto di embeyecemento di Eagle Beach a causa algun reaccion entre ciudadanonan, na unda cu hopi ta cuestiona pakico en bes di inverti den embeyecemento di e area aki, no ta inverti pa drecha e situacion di emergencia cu tin cu e planta di Rioolwaterzuiveringsinstallatie (RWZI) Bubaliplas.
Na mas di un ocasion turistanan bishitando Aruba a expresa ariba rednan social nan mal impresion cu e holor stinki y insoportable pa motibo di e situacion di Bubaliplas.
Dia 15 di november ultimo por a mira un comunicado di Gobierno di Aruba indicando cu despues di yobida di ultimo dianan e volumen di awa cu a acumula den Bubaliplas a yega na un nivel critico. Na e momentonan aki no tin capacidad den e plas mes pa sigui retene tanto awa y tampoco ta responsabel pa laga e nivel sigui subi y desborda den vecindario.
“Esaki ta un situacion di emergencia pa cual Gobierno, den coordinacion cu tur departamentonan
concerni, incluyendo oficina di maneho di crisis, a analisa tur opcion y a keda nada otro cu
aproba pa habri e sluisnan di emergencia temporalmente pa asina baha e nivel di e awa den
Bubaliplas,” nan a remarca.
E capacidad di procesa di Bubali Plas ta demasiado chikito y ademas falta di mantenemento di tuberia, entre otro entre high rise y Bubali, a kibra y awa sushi ta bin halto. E tuberia tin por lo menos 30 aña sin cambia y e problemanan ta keda montona.
