Partido Direccion Politiea (PDP) ta e partido politico mas nobo, te na e momentonan aki, na Aruba y ta wordo lidera pa e hoben studiante di ley, Leonardo Figaroa. Durante su prome conferencia di prensa diahuebs mainta, Figaroa a elabora ariba diferente topico, entre otro derechonan di mucha y abuso sexual, pero durante e conferencia el a resalta tambe kico, como un hoben politico drentando e arena politico, ta su vision y speransa como un posibel futuro gobernante di pais Aruba.
Figaroa a remarca cu hopi politico na Aruba, algo cu el a siña durante e ultimo eleccion, tin interesnan personal y esey, el a señala, ta un problema hopi grandi pasobra mayoria biaha na ta drenta politica cu un bon meta den mente, pero na caminda esey ta bay perdi y e no ta bira mas tocante traha pa e pais, e ta bira traha pa sigura nan cartera y nan beneficionan.
No ta un secreto cu hopi persona den pueblo aworaki tin hopi desconfiansa den politica. Tocante esaki, e hoben lider di PDP a resalta cu como un partido nobo nan no ta bay priminti di haci tur cos diferente, pero locual cu nan ta purbando di haci ta stimula e pais pa compronde nan pensamento di un forum politico.
“Esey kiermen cu pa mi e no ta importa si mañan bo vota pa mi si of no, claro cu mi tin e deseo pa bo vota pasobra mi kier representa bo, mi kier ta un di bo parlamentarionan mas hoben pa eleccion di 2025, pero e esencia real di e campaña electoral pa nos ta un dialogo cu e pais,” el a remarca.
“Aworaki nos tin un gobierno cu ta asina desconecta for di e realidad,” el a indica. El a señala cu PDP no tin pensa di hiba e campaña di T-shirt, bandera, fiesta pasobra no tin nada di fiesta aworaki na Aruba. “Nos tin un pobresa nobo na e pais aki, nos tin hende, tata, mama cu mester traha dos pa tres trabao pasobra costo di bida a subi. Nos kier hiba un campaña serio basa solamente riba solucion. Si mañan e pueblo vota pa PDP, kico abo por haya como solucion si nos ta esunnan yama pa drenta gobierno?,” el a agrega.
Kedando den e mesun liña, Figaroa a subraya cu loke realmente ta interes ta kico e politiconan ta haci ora nan ta den gobierno. El a cuestiona pakico tin un lider di oposicion cu a bay Hulanda cu un sociaal cultureel plan bureau mientras cu Aruba mester di e lider di oposicion y di e parlamentario pasobra pueblo ta paga nan pa traha aki na Aruba.
“Locual ami ta haci ta cu mi ta cuestiona nan pasobra na final di dia, ora bo ta un politico, bo tin cu responsabilisa bo mes na e pueblo di Aruba. Nos ta kere cu e vision cu PDP ta trahando riba dje ta un vision cu hopi persona por haya su mes aden y locual ami kier stimula pueblo ta drenta den dialogo cu nos partido, pasobra nos ta bay habri nos miembresia pronto,” el a indica.
Figaroa a enfatisa cu PDP no ta un partido na unda e lider ta e unico cu lo dicta y manda, pero mas bien ta e miembronan ta esunnan cu ta bay tin e ultimo palabra.
El a splica cu e motibo ey mes tambe e partido a dicidi di cambia su statutonan di tal forma cu e como lider e no ta esun cu tin e ultimo palabra, pero ta e miembronan ta esnan cu ta bay bisa ken nan kier wak riba ki number riba lista y kico ta e programa cu nan ta sinti ta importante.
Na mesun momento el a sigura cu si PDP mañan haya su mes den un situacion manera a surgi cu parlamentario Sievenger, e persona ey no lo ta mas miembro di e partido pasobra, for di su punto di bista, e miembronan lo duna un mensahe cla y raspa cu nan no ta para pa personanan cu a wordo condena
El remarca cu aunke Sr. Sievenger ta den su proceso legal den su apelacion, e punto ta e topico di integridad y e nubia preto cu ta colga ariba un instituto manera Parlamento di Aruba ora cu tin politiconan cu ta wordo investiga y cu ta wordo condena.
“P’esey mi a bisa cu pa nos tabata importante pa habri e staatsregeling di pais Aruba manera tin’e na Corsou y Sint Maarten, nos kier wak un articulo cu ta indica cu na momento cu un minister ta cay den investigacion di Ministerio Publico, e tin cu pone su funcion abao,” el a señala.
Por ultimo e lider di PDP a toca e topico di transparencia y el a remarca cu di gobierno ta transparente y ta brinda tur e documentonan, y si mañan pa un of otro motibo, MEP no ta e partido cu ta sigui den gabinete mas y in traspaso di gobernacion, transparencia ta permiti nan haci un bon traspaso.
Figaroa a indica cu e berdad ta cu traha ley na Aruba no ta facil y pa full e pais tin solamente ocho hurista specialisa cu ta traha na DWIZ, y esey, el a señala, lo por ta un indicacion di pakico pais Aruba no ta cumpli cu normanan internacional, pasobra gobierno no ta pone como punto di atencion.
El a enfatisa cu loke nan kier mira ta un miho conexion, un miho relacion entre kico ta e suministro di studiantenan cu ta caba nan estudio universitario cu nan por haya un trabao na Aruba mes y no mester bay otro caminda pa haya un trabao den nan ramo.
“Ora ami caba di studia mi tin un debe di 120 mil florin na Arubalening, y tin hende den gobierno cu no tin ni un mavo diploma cu ta cobra shete mil florin pa luna. Kico ta e mensahe cu bo ta manda pa mi como studiante. Tambe mi ta wak cu na Boneiro e salario minimo ta 1800 dollar, mi ta wak cu na Boneiro no solamente nan ta paga mi pa traha den belasting kantoor, pero nan ta bisa mi cu nan ta paga mi estudio tambe,” el a resalta.
Pa finalisa el agrega cu pa PDP e esencia ta cu nan kier pa e gobierno lanta for di soño pasobra tin hopi hoben ta bayendo y nan no kier perde e inteligencia ey cu por wordo usa aki na Aruba pa hiba e pais pa dilanti.
