Par di dia pasa, a bay viral un video di un usuario di Arubus na unda tabata mustra un otro persona cu tabata agredi verbalmente y pushando e chauffeur di e bus cu e tabata dispuesto pa haci uso di dje, mesora diferente reaccion a tuma luga y tambe di e mesun compania Arubus N.V.

Den e un comunicado Arubus NV a splica cu e compania “no ta tolera ningun falta di respet, tampoco ningun tipo di mal comportacion contra cualkier empleado di nos compania y tampoco contra ningun di nos pasaheronan.”

Manera por a mira caba riba medionan social, tin un video circulando caminda un pasahero ta falta respet contra di un di nan chauffeurnan diaranson ultimo.

“Siguiendo nos procedura custumbra, a analisa tur prueba cu por a haya, interno y externo. Tambe nos a scucha e chauffeur en cuestion su experiencia cu e caso y muy principalmente pa su situacion emocional den e caso aki. Na momento cu pruebanan a wordo analisa y documenta, Gerencia a bay over na tuma un decision riba e a caso aki. Mesora gerencia di Arubus a informa e persona en cuestion pa medio di un carta, cu su persona ta prohibi di subi cualkier propiedad di Arubus, incluyendo nos busnan pa un tempo indefini.”

Alabes Arubus a elogia e chauffeur en particular cu a haya su mes den e incidente aki, caminda e la demostra un actitud hopi trankilo y profesional y a sa di domina su mes na e miho manera cu Arubus por a spera di su persona.

Pa medio di esaki Arubus NV kier enfatisa, cu lo no tolera ningun tipo di agresion, falta di respet, intimidacion y mucho menos insultonan den direccion di nan empleadonan ni tampoco nan pasaheronan riba cualkier propiedad di Arubus, incluyendo busnan riba caminda transportando publico.

Arubus NV ta spera cu e tipo di incidentenan, manera esun di diaranson ultimo no tuma luga mas y cu nos por sigui brinda e mihor di nos servicio na tur nos pasaheronan.

“Un acto inaceptabel”

Pa minister encarga cu Transporte Ursell Arends, esaki ta un acto inaceptabel, el a señala cu el a tuma nota di un video alarmante unda un persona a bira agresivo riba un chauffeur di Arubus.

“Un comportacion inaceptabel y ta un falta di respet rotundo pa trahadonan cu ta esencial pa transportacion na Aruba. Nos ta condena e acto aki y ta spera cu autoridadnan concerni tuma debido accion.” E mandatario a sigura riba su rednan social.