E proyecto cu a cuminsa 11 di april di e aña aki finalmente ta kedando cla aunke cu varios contratempo manera DOW a informa anteriormente, siman pasa e departamento aki a pidi 5 dia extra pa por caba cu e trabaonan di pone klinkers y asina por a habri e caminda ayera.

Ayera, mediante un publicacion riba su rednan social DOW a menciona cu e proyecto no ta 100% cla, debi cu ta falta pa pone klinkers na e stupinan y caba cu par di afwerkingnan chikito, pero a caminda si a habri..

Nan a duna danki na e comunidad pa e comprension y nan a anuncia tambe cu fase 2 di embeyecemento di Wilhelminastraat (parking) tambe lo cuminsa pronto.

Na comienso di augustus, nan a informa cu a hiba materialnan na e sitio pa e trabaonan por sigui cana, e contratista a cuminsa cu e trabaonan di RWA den Columbustraat. Nan tambe a bay coba den caminda, pone tubonan y e cera e bakprofiel bieuw. Esey tabatin un duracion di 5 siman.

Ora nan a finalisa cu e trabao di e bakprofiel bieuw nan a cuminsa cu trabaonan di pone klinkers riba e caminda.

Den e prome siman di september, a cuminsa cu trabaonan di RWA den Wilhelminastraat sigui pa trabaonan di klinkers, unda un parti di a keda cera.

Esaki tabata e planning cu contratista a duna na nan y nan tabata premira cu e prome siman di october e proyecto lo por a keda cla si no haya ningun contratiempo mas, algo ciertamente a sucede.

Dia 11 di april 2023 a cuminsa cu e proyecto di renoba y structura e caminda di Columbustraat y un parti di Wilhelminastraat.

E proyecto ta encera renoba Columbustraat unda e caminda ta bay bira den di asfalt pa klinkers y crea mas area pa peatonnan. Tambe crea mas zona di parkeer, crea un plasa y embeyece e area cu klinkers, pone mata y luznan.

Den Wilhelminastraat e proyecto ta encera cu for di e crusada di Columbustraat te cu e crusada di Ooststraat, lo transforma e caminda di asfalt pa klinkers y tambe crea mas area pa peatonnan.

“Lamentablemente den e proyectonan akinan tambe a experiencia un retraso pa motibo cu ora e frees e caminda a encontra cu e bakprofiel tabata hopi halto y e deksel tabata den mal estado. Cual cu ora cu un truck a para riba dje, esaki a cay completamente den otro. Mirando e situacion di con e deksel a keda, mester a tuma un decision kico ta e siguiente paso cu lo bay tuma y esaki lamentablemente a causa un retraso grandi riba e proyecto,” nan a informa.

Nan mester a haci ful un diseño nobo pa motibo cu un parti di e bakprofiel ta pasa bao di 2 edificio y nan kier a hala esaki for di bao di e edificionan. Esaki lo bira un proyecto separa di e proyecto di embeyecemento pa motibo cu nan mester a canalisa e fluho di awa cana bon.