Recientemente, minister di Finanzas, Xiomara Maduro a causa controversia cu un discurso na un evento di Genootschap Nederland-Aruba, den cual a compara e interes cu Hulanda a impone durante e negociacion pa refinanciamento di debe di Covid cu “un forma nobo di sclavitud.”
Bon Dia Aruba a puntra prome minister Evelyn Wever-Croes si e declaracionnan aki, cu ta contradeci loke prome minister mes a yega di bisa tocante e negociacionnan cu Hulanda, lo tin un impacto riba e negociacion cu ta andando actualmente. Maske no a ricibi un contesta directo, prome minister si a aborda e tema durante un entrevista na e programa NoticiaCla Live diaranson anochi. “E no ta afect’e,” el a bisa.
Durante e programa, Wever-Croes a contesta e pregunta si e discurso controversial di Maduro ta conta cu sosten di gobierno di Aruba, pa loke el a contesta, “si, mi ta sostene.”
Esaki despues cu parlamentario di Fraccion MAS, Marisol Lopes Tromp, a cuestiona e falta di “unidad den maneho” na momento cu di un banda, Wever-Croes ta referi usualmente cu e negociacionnan cu Hulanda ta anda cu respet pa otro y bon, mientras di otro banda Maduro a indica cu e trato cu ta ricibi ta falta di respet y cu ta comparable cu “un forma nobo di sclavitud.” Sinembargo, awo Wever-Croes ta indica cu no tin contradiccion den nan ponencia, sino cu el a “papia di esaki na varios ocasion” prome cu Maduro a bay Hulanda.
