Ayera mainta, Leonardo Figaroa, lider di e partido politico mas nobo na Aruba, Partido Direccion Politica (PDP) a tene un conferencia di prensa durante cual el a trece pa dilanti diferente topico, entre nan e topico di derechonan di mucha y abuso sexual.
Figaroa a indica cu recientemente e tabata den un programa di noticiero local unda cu el a presenta un tiki di e idea di PDP ariba con for di nan punto di bista e muchanan mester haya un poco mas proteccion.
El a splica cu na Aruba nos tin un tratado cu ta conta pa tur mucha entre 0 te cu 18 aña di edad y el a resalta cu awe, despues di 22 aña di un tratado di derechonan internacional, tin hopi protocol cu a keda sin wordo ratifica.
Pa nos di PDP e vision ta pa nan por haya representacion y haya bo confiansa durante eleccion y cu ora nos drenta parlamento esaki sigur pa mi ta bira un punto cu mi kier enfoca ariba dje
“Awe mi tabata kier a para keto un rato ariba kico pa nos e politica ta. E politica pa PDP no ta djis un politica di critica, no ta djis un politica di señala kico ta e problema- y retonan. Pa nos e ta un politica ariba proposicion- y solucionnan cu nos ta kere ta esencial pa por logra yega na mas proteccion pa nos muchanan,” el a remarca.
E lider politico a indica cu ayera mes nan a haci un logverzoek (solicitud di registro), pa asina solicita diferente documento for di Gobierno di Aruba.
El a señala cu recientemente tabatin un comunicado di prensa di Minister Rocco Tjon unda cu, segun Figaroa, e minister a duna di compronde cu el a sinta cu e Comision di Derechonan di Mucha.
Den e caso aki, el a indica, loke su partido a haci peticion na Gobierno di Aruba, a traves di logverzoek pa Minister di Husticia por brinda nan tur e documentonan cu e comision aki a haya durante tur e añanan aki, kico ta e estudio cu e comision aki a haci, con leu e comision aki ta pa por duna un idea di con ta protehando e muchanan y si e comision tambe tin sugerencia pa gobierno. “Pa nos e ta importante pa sa kico ta e sugerencianan aki,” el a resalta.
Apart di esaki, el a agrega, PDP a haci e peticion tambe na Minister Tjon como Minister di Asuntonan Social, ken ta e persona cu ta carga den su gran mayoria e responsabilidad di mucha y derecho, pa brinda nan e documentonan cu ta delinea kico e minister a bin ta haci, mirando ya caba e gobernacion aki ta bay cumpli dos aña na mando.
“Pa nos e ta un bon momento tambe pa wak ok, gobierno a propone den nan programa di gobernacion cu nan ta boga pa proteccion di mucha, pa participacion di hubentud, y pa nos e ta importante pa haya un idea e ora di kico gobierno a haci te cu awo,” el a indica.
Figaroa a remarca cu PDP ta spera di por haya un contesta for di Minister Tjon, dentro di seis siman, cu ta locual ley ta indica, y si esey no ta e caso, el a agrega, nan ta duna Minister Tjon seis siman mas y despues si mester bay corte nan ta dispuesto pa bay corte pa peticiona e documentonan aki.
E di dos topico cu e lider di e partido nobo a trece pa dilanti ta e topico di abuso sexual. Figaroa a señala cu esaki ta un topico cu durante hopi aña, segun el a menciona, por a wak Prome Minister ta campaña cu e palabra ‘seis minuut’. El a indica cu esey ta locual el a bisa den su campaña electoral, cu ora cu MEP drenta gobernacion den seis minuut nan ta bay pasa e ley.
El a sigui splica cu despues tabatin un di e manifestacionnan mas grandi di historia di pais Aruba unda diferente organisacion y fundacion a uni y a entrega un manifesto cu tabatin nuebe punto pa cu cambionan den ley, tabatin ocho punto pa cu cambionan den maneho di gobierno y tabatin dos punto pa loke ta e aspecto di instancia y fundacionnan.
“Pa nos ta importante pa puntra Gobierno di Aruba con leu esakinan ta, dus nos a manda atrobe peticion na Minister Tjon, via un logverzoek, tur e documentonan cu gobierno tin ariba e topico aki. Nos kier duna gobierno e oportunidad pa responsabilisa su maneho, tuma responsabilidad di kico el a bin ta haci y despues si nos ta sinti cu locual gobierno a haci no ta suficiente, e ora si nos lo cuestiona fuertemente kico ta locual gobierno a logra te aworaki,” el a subraya.
El a enfatisa cu ta importante, si e minister ta pensa cu e topico di abuso sexual ta uno importante, cu e minister lo mester a duna parlamento cada seis luna, cada kwartaal, un splicacion di kico nan a bin ta haciendo.
Na mesun momento el a agrega cu ta importante pa pueblo sa cu tin un ley cu ta duna tur ciudadano e derecho pa pidi documentonan cu gobierno ta usa of un minister ta usa pa por responsabilisa su decision.
“Mi ta spera cu nos por haya oido y no solamente ami, pero tambe e 19 mil muchanan cu no por vota e siguiente eleccion cu gobierno por respeta nan posicion, cu gobierno ta bisa nos ta para na banda di e hoben- y muchanan y nan derecho y nos ta spera cu gobierno por haci un poco mas ariba e topico aki,” el a subraya.
Por ultimo, Figaroa a remarca e importancia di participacion di hoben pasobra mas y mas mucha y hoben ta cay den gang, den droga, den alcohol y ora cu ta sali na cla cu muchanan ta casi pone fin nan bida, e Minister di Salud Publico no ta sali bin pa dilanti y bisa cu tin un plan nacional di accion pa stimula e muchanan pa haya acceso na cuido di salud mental.
