Ayera, informacion a yega na mesa di redaccion di Bon Dia Aruba cu ta indica cu e incinerator na dump ta daña, cu consecuencia cu no por procesa desperdicio medico of restonan di animalnan morto.
Por a compronde cu mientras cu e incinerator no ta funcionando, ta wardando e tipo di desperdicio aki di un of otro manera te ora cu por yega na procesa esaki debidamente.
Bon Dia Aruba a tuma contacto cu minister di Naturalesa, Ursell Arends, pa haya e informacion corecto riba e asunto aki. Arends a contesta confirmando cu en berdad e incinerator a daña, desde dia 8 di september ultimo. Arends a indica cu ya a bestel e piesanan necesario pa su reparacion, y cu ta spera cu e siman aki ya e incinerator lo ta trahando back.
Tocante e situacion temporal di e desperdicio, Arends a bisa cu “durante e temporada aki a tuma medida pa temporalmente almacena nan di un forma sigur, y ta percura cu asina e incinerator ta back den funcion, lo procesa nan.”
Tambe Bon Dia Aruba por a compronde cu e trahadornan cu ta a cargo di e trabao pa procesa e desperdicio medico y resto di animalnan aki a ser manda cas cu pago mientras tanto. Sinembargo, Arends a indica cu e no por confirma of desmenti esaki, ya cu e incinerator ta cay bao di operacion di DOW y su personal. Bon Dia Aruba a tuma contacto cu DOW pa confirma e informacion, pero te ciere di redaccion no a ricibi ningun contesta.
Potretnan ta di archivo.
