(NLTimes) – Gobierno Hulandes kier prohibi oficialnan di gobierno usa software di AI manera ChatGPT y creadornan di marca of imagen manera Dall-E y Midjourney pa awo. E riesgonan pa loke ta trata privacidad y copyright actualmente ta demasiado halto, Secretario di Estado Alexandra van Huffelen (Asuntonan Digital) a bisa den un proposicion cu Volkskrant a obtene.
Van Huffelen a crea e proposicion a base di investigacion di Abogado di Estado Pels Rijken y Dutch Data Protection Authority (AP). Nan a conclui cu e “e aplicacionnan generativo di Inteligencia Artificial generalmente a demostra di no cumpli cu e legislacion di copyright y privacidad Hulandes.”
Segun Van Huffelen, “no ta cla” si e proveedornan manera Google of OpenAI suficientemente ta considera e autornan su derecho. E modelonan di lenguahe tras di chatbot manera ChatGPT y Bard a ricibi training cu cantidadnan grandi di texto, incluyendo bukinan y archivonan riba cua copyright ta existi. Esaki ta aplica tambe na image AI. Varios proveedor no ta transparente tocante e trabao cu nan ta usa, Van Huffelen a skirbi.
E ta preocupa cu e privacidad. “Un aplicacion di AI generativo tambe por haci uso di informacion sumamente sensitivo for di interaccion cu e usuario.” Tambe e contestanan cu e programa di AI ta provee “por ser usa pa tuma un decision tocante un individuo,” cual ta otro causa pa preocupacion.
Van Huffelen a agrega cu e no kier descarta uso di AI generativo dentro di gobierno completamente. E tin plan di ehecuta varios experimento pa mira con e servicionan di gobierno por usa tecnologia di manera safe. E pilotonan mester por ta cla pa 2024, despues di cual e gobierno por crea guianan pa e uso responsabel pa uso di AI. Tambe lo tin un programa di training pa ambtenaarnan.
Conseho di Ministernan pronto lo trata e proposicion, segun Volkskrant. Si aproba, e prohibicion aki lo aplica na servicionan di gobierno y nan proveedornan.
