(Reuters) – Diaranson ultimo congreso Peruano a aproba pa kita e minister di Interior, memey di criticanan di diferente partidonan politico tocante su maneho den e lucha contra delincuencia, aunke tin medidanan di emergencia contra insiguridad ciudadano.
Casi 75 legislado a vota na fabor di e censura di minister di Interior, Vicente Romero, superando e limite pa expulsa un minister di Estado. Awor e funcionario mester presenta su renuncia na presidente Dina Boluarte.
Den e ultimo medidanan pa stop e crimen, Gobierno di Boluarte a modifica e codigo penal pa castiga hasta cu bida largo na esnan cu lo horta un telefon celular y lo causa lesion grave of morto na e victima.
Prome, a declara emergencia den varios districto di e pais, pa permiti cu militarnan por apoya polis den operativonan contra insiguridad ciudadano.
Algun funcionario di gobierno a señala cu migracion di stranhero, principalmente di Venezolano, ta un di e causanan principal di aumento di delincuencia na e pais.
Por lo menos 1.5 miyon Venezolano ta bibando na Peru, mayoria di nan a yega for di 2017 ora a flexibilisa e normanan di entrada pa migrantenan Venezolano.
E siman aki Gobierno di Boluarte, cu ta na Merca den un reunion di Foro Economico Asia-Pacifico (APEC) a aproba un serie di normanan pa permiti expulsion lihe di stranheronan cu no a regularisa nan situacion migratorio of a comete algun delito na e pais.
