Un di e iniciativanan principal di e campaña Limpi Limpi ta separacion efectivo di desperdicio. Durante e ultimo lunanan un parke pa separacion di desperdicio ta den rotacion di districto pa districto. Cu cada evento di Baki den Bario, a evalua y adapta e operacion hunto cu tur partner. Cu e acogida a ricibi mas interes y asina a expande e operacion pa acepta mas tipo di desperdicio.

Ministerio di Naturalesa ta enfatisa cu e orario a wordo evalua y ahusta teniendo na cuenta e orario cu hende ta presenta, e logistica pa atende cu e desperdicio na un manera responsabel, experiencianan y datonan di pasado y tambe e labor, cual ta e parti humano cu ta rekeri pa haci e trabou den solo.

Diasabra binidero, 18 di november 2023 Baki den Bario lo ta na Centro di Bario Ayo. Invitacion ta bay na bisindario di entre otro Ayo, Matividiri, Paradera, Babijn, Tamarijn, Rooi Afo, Meiveld, Piedra Plat, Jaburibari pa prepara di antemano.

Fin di october Minister di Naturalesa, Ursell Arends conhunto cu Paradise Scraps a anuncia cu Baki den Bario ta acepta azeta di cushina tambe. Yamada ta bay na comunidad pa deshaci di nan azeta di cushina usa responsablemente y trece na Baki den Bario.

Separa bo metal, e-waste, carton, greenwaste, desperdicio di construccion, taira, azeta di cushina usa y bulkwaste. Recordatorio cu Baki den Bario ta solamente pa uso residencial y no ta habri pa desperdicio comercial.

Tambe Minister Arends ta encurasha henter comunidad pa si acaso tin productonan manera comestibel, paña y mueble cu por wordo reusa, pa trece esaki nan na e stand di Fundacion pa Nos Comunidad. Boluntarionan lo t’ey presente pa asisti den e entrega y acepta donacion.

Serlimar su helpdesk tambe lo t’ey presente pa ofrece asistencia ariba nan servicionan. Un di nan servicio ta transporte riba e diasabranan di Baki den Bario, unda nan lo pasa recoge desperdicionan manera greenwaste (mata, taki, yerbe) y demas tipo di desperdicio acepta na Baki den Bario.

“Boso esfuersonan ta haciendo un diferencia real den e manera con como comunidad nos ta anda cu desperdicio. Danki pa separa pa nan por wordo procesa corectamente y responsablemente. Nos ta den un transicion historico pa loke ta trata maneho di desperdicio na Aruba y den Caribe.” – Minister Ursell Arends

Sea consciente di bo desperdicio, mantene Aruba Limpi Limpi!