(NLTimes)—Varios organisacion di derecho humano y ayudo ta lantando casi contra estado Hulandes tocante e posicion di Hulanda pa Israel y e guera na Gaza, segun Oxfam Novib a reporta ayera. E organisacionnan ta argumenta cu Hulanda ta “parcialmente responsabel pa violacionnan di e leynan di guera y castigo conhunto di e poblacion civil na Gaza,” particularmente debi na su continuo exportacion di arma pa Israel.
Oxfam Novib, Amnesty International, PAX, y The Rights Forum ta actualmente preparando e caso. Nan ta demanda pa e gobierno Hulandes actua den acuerdo cu su frameworknan di politica, obligacion constitucional y acuerdonan internacional, cual nan ta alega no ta tumando luga.
Segun e organisacionnan aki, Hulanda ta nenga di duna Israel e responsabilidad pa “violacionan serio di e leynan di guera,” a pesar di mas cu 12,000 morto na Gaza. Tambe nan ta critica Hulanda pa sigui exporta jetnan F-35 pa Israel, manera a ser reporta recien pa NRC, a pesar di advertencianan for di consehonan legal na e Ministerio di Asunto den Exterior tocante posibel “violacion di leynan humanitario” na Gaza.
Michiel Servaes, director di Oxfam Novib, a declara cu e bomnan riba Gaza pa Israel ta haci’e
“imposibel” pa su personal provee ayudo na civilnan: “Ta casi increibel cu e bomnan aki ta ser tira cu apoyo militar Hulandes. Esaki tin cu stop. E ta un stap no comun pa nos bay corte, pero si ta necesario, desafortunadamente no tin otro opcion,” el a bisa.
Martje van Nes, director di PAX, a nota cu Hulanda tin un framework di evaluacion specifico pa exportacion di arma, cual ta prohibi exportacion ora productonan militar por contribui na violacionnan di derecho humano of leynan humanitario internacional. “Ta incomprendibel cu e gobierno ta desvia di esaki, a pesar di advertencianan claro. Esaki ta haci cu nan ta parcialmente responsabel pa e uzo di e ekipahe,” el a agrega.
Dagmar Oudshoorn, director di Amnesty International, a observa cu Hulanda gusta presenta su mes como un “campeon di ley internacional.” Sinembargo, el a adverti cu e gobierno Hulandes ta “perdiendo tur credibilidad.” Tambe el a bisa cu por medio di exporta arma pa Israel, Hulanda ta riesga “birando responsabel den violacionnan di ley humanitario internacional.”
E organisacionnan ta ser asisti pa abogadonan Liesbeth Zegveld y Thomas van der Sommen. Un campaña pa recauda placa pa e proceso a ser lansa ayera y otro organisacionnan lo ser invita pa apoya nan caso.
