(AP) — Un lider di gang poderoso y temi na Haiti, kende antes tabata un maestro di matematica y fisica, a ser mata den un bario dentro di un ‘slum’ amplio banda di lama cual e tabata controla pa añas, segun medionan local a reporta ayera.
E morto di Iskar Andrice, kende tambe a keda identifica como IScar Andris, a genera preocupacion cu violencia di gang, ya caba rampante, por aumenta mas den e bashi crea pa su morto.
Andrice tabata controla e comunidad Belekou dentro di e slum Cite Soleil unda el a muri, ex-alcalde Esaie Beauchard a bisa Radio Galazie FM.
No tabata inmediatamente cla ki dia Andrice a fayece.
Jean-Frédérique Islain, alcalde actual di Cite Soleil, a nenga di duna comentario ora AP a tuma contacto.
E gang cu Andrice tabata lidera tabata involucra den asesinato, hortamento, extorsion, violacion, confiscamento di producto y truck, segun un rapport recien di ONU. Despues el a join forsa cu lider reconoci di gang, Jimmy Cherizier, conoci como Barbecue, kende a forma e aliansa “G9 Famia y Aliado”, e grupo di gang mas grandi y poderoso na Haiti.
Entrevistanan na medionan di comunicacion otorga pa Cherizier mester tabatin aprobacion di Andrice prome.
ONU a bisa cu Andrice, manera otro lidernan di gang, a crea un fundacion social na 2015 conoci como Siloe Foundation pa gana e comunidad cu e tabata controla y presenta un imagen positivo di su mes.
A acusa Andrice y otro lidernan di gang di lidera varios accion mortal riba barionan Haitiano cu a enfoca riba civilnan, segun un rapport di National Human Rights Defense Network na Haiti.
Tambe a acusa nan di paralisa operacion na e terminal principal di fuel na e capital, Port-au-Prince, aña pasa, debilitando e pais y forsando prome minister Haitiano, Ariel Henry pa haci su prome solicitud pa despliegue urgente di un forsa arma stranhero.
