(AP) — Activista di clima, Greta Thunberg a keda interumpi brevemente ayera pa un homber cu a acerk’e riba escenario despues cu el a invita un muhe Palestino y un Afghano pa papia na un protesta pa clima na e capital Hulandes.
Thunberg tabata papia cu un multitud di diesmiles na momento cu el a invita e muhenan riba escenario. “Como un movemento pa husticia di clima, nos mester scucha e stem di esnan cu ta oprimi y esnan cu ta luchando pa libertad y husticia. De lo contrario no por tin husticia climatico sin solidaridad internacional,” Thunberg a bisa.
Despues cu e muhenan Palestino y Afghano a papia y Thunberg a reanuda su discurso, un homber a subi escenario y a bis’e: “Mi a bin akinan pa un manifestacion pa clima, no pa un opinion politico” prome cu a bah’e for di escenario. No a revela identidad di e homber inmediatamente. E tabata bisti un jacket cu nomber di un grupo yama Water Natuurlijk cu tin miembronan electo den hunta di awa na Hulanda.
E muhe Afghano, Sahar Shirzad, a bisa AP cu Thunberg a laga nan subi escenario cune. “Basicamente, el a duna nos su tempo,” el a bisa.
Prome cu Thunberg a subi escenario, e evento a keda interumpi brevemente pa un grupo chikito di activista dilanti di e multitud cu tabata zwaai bandera Palestino y grita frasenan pro-Palestina. Thunberg no a parce di worry y despues a mir’e ta baila tras di escenario mientras un banda tabata toca.
E incidente a bin despues cu diesmiles di persona a marcha door di cayanan di Amsterdam exigiendo mas accion pa combati cambio climatico, den un protesta masivo apenas 10 dia prome cu un eleccion nacional. Organisadornan a bisa cu 70mil persona a participa den e marcha y a yam’e e protesta di clima mas grandi den historia di Hulanda.
Thunberg tabata entre hende canando door di e curason historico di e capital Hulandes. Lidernan politico, incluyendo ex-hefe pa clima di Union Europeo, Frans Timmermans, kende awo ta dirigi un bloc di dos partido di centro-iskierda den campaña di eleccion, despues a dirigi su mes na e multitud reuni na un plaza tras di e Rijksmuseum.
“Nos ta biba den un tempo di crisis, tur di cual ta resultado di e escogencianan politico cu a haci. Mester hacie y por hacie diferente,” e organisador, Coalicion pa Crisis di Clima, a bisa den un declaracion. Mientras cu e coalicion a inclui e movemento hubenil Diabierna pa Futuro, manifestantenan tabata di tur edad y a inclui un contingente grandi di dokter den nan paña blanco cargando un brochi cu e texto: “Crisis di clima = crisis di salud.”
“Mi ta un pediatra. Mi ta aki ta para pa derecho di mucha,” segun Laura Sonneveld. “Muchanan ta e promenan afecta pa cambio climatico.”
Combati cambio climatico ta un di e areanan clave di politica pa partidonan politico competiendo den eleccion general dia 22 di november proximo.
