Manera ta conoci, ayera tabata e ultimo dia di bishita di prinses Beatrix na Aruba, cual e ta realisando bao invitacion di DCNA, organisacion di conservacion di naturalesa di cual e prinses ta patron. Como parti di e bishita, a invita e prinses pa presencia e proyecto exitoso di reintroduccion di Lora na Aruba.
Diabierna mainta Minister di Naturalesa, Ursell Arends tabatin e honor pa acompaña Su Altesa Prinses Beatrix na e proyecto di Fundacion Parke Nacional Aruba y siña mas ariba e reintroduccion di lora na Aruba.
Lora ta un parha endemico, pero ya pa varios aña no por haya nan mas den nos naturalesa. E proyecto pa reintroduci loranan lo percura pa unabes mas nos por gosa di e parhanan aki den Aruba su naturalesa.
E proyecto ta un ehempel di colaboracion entre Aruba y Boneiro unda intercambio di conocemento y esfuersonan entre esnan envolvi pa logra un proyecto exitoso. Trahando hunto por amplifica nos logronan na beneficio di nos comunidad y nos herencia natural.
FPNA, como entidad encarga di e campaña di conscientisacion y educacion na e comunidad di Aruba ariba Lora, ta hunga un rol vital. Nan trabou ta asegura cu tur persona ta compronde e importancia di nan rol pa e proteccion di nos parha nativo. Cada ciudadano por contribui na mantencion di nos herencia natural, y tur e tesoronan cu nos naturalesa ta ofrece.
Pabien na e ekipo di Fundacion Parke Nacional Arikok pa nan esfuerso destaca y dedicacion pa haci e proyecto un realidad. Nan trabou ta representa un paso importante pa recupera nos patrimonio natural y ta demostra nan compromiso na nos flora y fauna. Pronto, ful Aruba lo por celebra e logro inmenso aki pa nos Pais!
