(AP) – Daniel Goldstein su mama di 86 aña a ricibi un email cu tabata parce di su banco. E tabata alarma pa motibo cu e no a gasta e placa cu a menciona den email, e ora el a yama e number cu a duna. E persona otro banda di e yamada a pidi pa su informacion di banco y a termina na horta 600 dollar.
Aña pasa, consumidornan di tur edad a cay victima na estafa y en total a perde 8.8 biyon dollar. Adultonan grandi ta esunnan cu a perde e cantidad mas grandi di placa compara cu otro gruponan di edad, segun Federal Trade Commission.
Mientras tur hende kier proteha nan mayornan y welonan for di estafadornan, tin biaha e combersacionnan aki por ta dificil pa nabega. “Nos ta encurasha hende pensa riba strategianan multigeneracional. Tur hende ta cay victima na estafa, e ta djis un manera diferente di con e estafador ta pone cay aden,” Genevieve Waterman di National Council on Aging a splica.
For di tin hopi empatia na conoce con pa reporta un estafa, expertonan a comparti cierto recomendacionnan pa papia tocante estafa.
Conoce cua tipo di estafa ta esun mas comun
Conoce cua tipo di estafa ta esun mas comun contra hende di edad avansa por yuda. Dos di esunnan mas comun ta e estafa di “welonan” y e estafa di romance, segun Kathy Stokes, director di prevencion di fraude na AARP.
E estafa di welonan ta ora un persona ricibi un yamada for di un persona cu ta gana di ta nan nieto pidiendo placa pa nan sali for di algun problema. E prome paso ta evita esaki y pa yama otro miembronan di e famia prome cu tuma cualkier accion segun e recomendacion di FTC.
Ora ta trata e estafa di romance, FTC a reporta cu personanan a perde 1.3 biyon dollar den ana 2022. Usualmente e estafador ta contact e victima via rednan social y despues ta hiba e combersacion na otro plataforma manera WhatsApp of Google Chat. “Hopi di e adultonan mas grandi awo ta drentando e mundo di romance, ‘dating’, online y nan ta teniendo hopi combersacionnan online pero esaki ta hiba nan na estafadornan cu por convence nan na duna nan placa y manda esaki exterior,” Waterman a splica.
Loke ta cuminsa como un simpel combersacion ta bira un conexion romantico diripiente. Sinembargo e persona despues ta pidi placa pa motibo cu algo a pasa den nan bida y nan mester ayudo. Segun FTC, e mentira usa cu mas frecuencia ta cu un persona cerca di nan ta malo, herida of den prizon” y/of “mi por siña bo con pa inverti.”
Otro tiponan di estafa comun ta estafa di inversion, sosten den tecnologia y robo di identidad.
Informa no impone
Ora di nabega topiconan complica den un combersacion, e ta miho pa tuma un tono informativo na luga di uno autoritativo. Pa motibo cu bo mayornan of welonan tin hopi experiencia den otro topiconan di bida, si bo cuminsa e combersacion pa medio di impone bo ideanan, esaki posiblemente no lo tin e miho efecto.
Waterman tambe ta recomenda pa tin e combersacionnan aki como un famia, incluyendo e miembronan mas chikito di e famia y sigura cu bo ta laga cla cu estafa ta ataca tur hende sin importa e edad. “E ta trata keda vigilante hunto como un famia y no desafia e adulto mas grandi sino di splica cu estafanan ta birando cada biaha mas sofistica,” Waterman a expresa.
