Ayera a tuma luga e prome dia di bishita di Prinses Beatrix na Aruba. Prinses Beatrix ta bishitando Aruba riba invitacion di Dutch Caribbean Nature Alliance (DCNA) y DCNA tambe lo ta compañando Prinses den su bishita na e otro islanan den Caribe.
E motibo di e bishita ta e congreso di DCNA tocante solucionnan amigable pa naturalesa pa restaura e ecosistemanan den islanan di Caribe Hulandes y Prinses Beatriz ta patron di DCNA.
Prinses Beatrix a cuminsa su bishita na Corsou dia 7 di november. Ayera durante e prome dia di su bishita, parti mainta Prinses Beatrix a bishita Neptali Henriquez Park, esaki riba su propio iniciativa y a bishita Fundacion Telefon pa Hubentud. Merdia e Prinses a sinta cu Gobernador di Aruba pa asina disfruta di un almuerzo.
Parti atardi, Prinses Beatrix a bishita Rooi Taki como tambe Spaans Lagoen na unda directiva di Fundacion Parke Nacional Arikok (FPNA) a duna e Prinses un recorido di e sitio di e proyecto di conservacion. E meta di e bishita ta pa mustra e proyecto- y programanan di conservacion cu ta wordo ehecuta na Aruba pa proteha, preserva y restaura ecosistemanan y biodiversidad na Aruba y pa cultiva un comprension mas profundo di solucionnan basa riba naturalesa.
Awe Prinses Beatrix ta bay haci un bishita na Parke Nacional Arikok. FPNA a inicia un proyecto akinan pa reintroduci un especie di parha cu a bira extinto na e isla back den naturalesa. E parha aki tin un distribucion limita, haciendo su reintroduccion na Aruba specialmente significante. E Prinses ta bay presencia un presentacion riba e programa aki di preservacion di biodiversidad y ta bay observa e parhanan na e sitio.
Atardi Prinses Beatrix lo ta atendiendo e Symposium di DCNA cu ta enfoca ariba solucionnan basa riba naturalesa. E symposium aki ta tuma luga na Universidad di Aruba.
