Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 14 di september 2023, CMM a dicidi pa baha e tasa di e reserva obligatorio cu 1,0 punto di porcentahe na 23,5 porciento entrante 1 di october 2023.
Di e manera aki, e banconan comercial mester tene un balansa minimo na BCA cu ta igual na 23,5 porciento di e depositonan riba termino cortico di nan clientenan. E decision pa reduci e tasa di reserva obligatorio ta basa primordialmente riba un caida continuo den e estimacion di likides excesivo di e sector bancario compara cu december 2022, primordialmente causa pa un subida den credito, mientras cu reservanan oficial y internacional ta permanece adecua, apesar di un caida. BCA ta sigui monitorea e desaroyo den e likides excesivo y lo por dicidi di cambia e tasa di reserva obligatorio, si ta considera esaki necesario.
E CMM a considera e siguiente informacion y analisis den su deliberacion.
Reservanan internacional y oficial
E reservanan internacional, cu ta consisti di reservanan oficial di BCA y reservanan di divisa na e banconan comercial, a baha cu Afl. 25,2 miyon te cu 25 di augustus 2023, compara cu fin di december 2022 (Grafico 1). E reservanan oficial a mengua cu Afl. 49,6 miyon, mientras cu e reservanan na banconan comercial a aumenta cu Afl. 24,3 miyon. Consecuentemente, te cu 25 di augustus 2023, e reservanan oficial y internacional a suma Afl. 2.741,3 miyon y Afl. 3.216,0 miyon, respectivamente.
Un nivel adecua di reservanan sosteni ta esencial pa mantene e tasa di cambio fiho entre e florin Arubano y e dollar Mericano. Teniendo cuenta cu esaki, apesar di e caida menciona anteriormente, reservanan internacional a keda ampliamente riba e rekisito di tres luna di pago riba e cuenta coriente di e balansa di pago den augustus 2023. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero. Reservanan oficial tambe a keda dentro di e margen aceptabel basa riba e metrico ‘Assessing Reserve Adequacy’ (ARA) di e Fondo Monetario Internacional (FMI) (Tabel 1).
Inflacion
Inflacion, midi na final di luna contra e mesun luna di e aña anterior, a baha na 1,7 porciento den juli 2023, un caida compara cu 2,8 porciento na juni 2023 (Grafico 2). E 1,7 porciento di aumento den prijs di consumo na juli 2023 tabata causa primordialmente door di e crecemento den prijs di utilidad, cu a sigui afecta e componente di ‘vivienda’ (contribuyendo cu 2,3 punto di porcentahe). Na un grado mas abou, ‘cuminda y bebida no alcoholico’ (contribuyendo cu 0,7 punto di porcentahe), ‘comunicacion’ (contribuyendo cu 0,6 punto di porcentahe), ‘mobilario’ (contribuyendo cu 0,4 punto di porcentahe), ‘restaurant y hotel’ (contribuyendo cu 0,4 punto di porcentahe) y ‘otro productonan y servicio’ (contribuyendo cu 0,4 punto di porcentahe) tambe a contribui na e inflacion midi na final di luna di juli 2023 contra e mesun luna di e aña anterior.
E inflacion midi riba promedio di 12 luna a baha na 5,6 porciento na juli 2023; un caida compara cu 5,9 porciento durante e luna anterior. E presion inflacionario tabata debi na e aumento den prijs di awa y coriente desde augustus 2022, vehiculonan mas caro, y prijsnan mas halto pa cuminda. Ademas, Aruba a importa un gran parti di e crecemento den prijs for di su partnernan comercial, particularmente Estados Unidos y Europa.
Mientrastanto, na juli 2023, inflacion basico (excluyendo cuminda y energia) a alcansa 1,0 porciento si midi e final di respectivo luna contra e mes un luna di e aña anterior (juni 2023: 1,8 porciento). Basa riba un promedio di e ultimo 12 lunanan, inflacion basico a yega na 2,2 porciento (juni 2023: 2,3 porciento).
Likides excesivo di e banconan comercial
Basa riba data semanal, estimacion preliminario di likides excesivo di e banconan comercial (incluyendo credito cu no a wordo aloca ainda y otro compromisonan) tabata Afl. 359,9 miyon riba 25 di augustus 2023, esta, Afl. 459,9 miyon menos compara cu fin di december 2022. E caida aki tawata principalmente debi na refinanciamento di fiansanan internacional riba mercado local y compra di bono di gobierno.
