A traves di un comunicado di prensa Minister di Turismo y Salud Publico, Dangui Oduber, a informa cu el a reuni cu e representante di e Sindicato di Empleadonan Publico y Priva di Aruba (SEPPA) y Trahadonan Organisa di Sector Publico (TOPA) pa presenta e “concepto sociaal plan” pa asina independisa e unidad di Dienst Warenkeuring en Hygiene (DWH) cu actualmente ta cay bao di DVG.
Minister Oduber a splica cu Dienst Warenkeuring en Hygiene (DWH) lo wordo independisa pa medio di un sui generis cu ta Aruba Quality & Hospitality Authority (AQHA). E tareanan di DWH lo wordo traspasa pa AQHA y e entidad aki lo ta esun responsabel pa permisonan di vacation rentals, hotels, y tambe procesa e aplicacion di restaurant- y barnan pa asina cumpli cu
e rekisitonan di higiena y tarifanan di e permiso. Cu esaki lo crea un “level playing field”
y tambe genera entrada pa gobierno.
Segun e minister a indica e reunion aki ta importante como cu e ta duna e oportunidad pa e representantenan di sindicato por duna nan aporte. Despues di e presentacion aki, e sindicatonan lo bay reuni cu nan miembronan pa asina bin bek cu nan reaccion.
E concepto, el a sigui splica, ta pa e unidad di DWH aki bira un sui generis y lo ta encarga cu henter e proceso di dunamento di permiso na vacation rentals. El a remarca cu entidad aki lo
funciona riba su mes di un manera mas eficiente y efectivo, y e obhetivo ta pa e mantene
un nivel di efficiencia, conformidad y asina sigura e calidad y un proceso mas transparente.
E mandatario a indica cu den e cuatro simannan proximo e ta bay brinda mas informacion tocante e desaroyo di e “concepto sociaal plan” y ta keda pendiente pa ricibi tur comentario y reaccion di e miembronan di e sindicatonan pa asina por sigui oficialisa e proceso di independisacion aki.
