(NLTimes) – Despues di e brote di guera na Gaza, e gobierno Hulandes a dicidi di sigui provee partinan di spare pa Israel su ‘fighter jet’ F-35 apesar cu oficialnan a adverti cu posiblemente ta usando esakinan pa comete “violacionnan serio na ley humanitario,” fuentenan di gobierno a conta NRC.
Den mita di october oficialnan a informa Minister di Exterior Hanke Bruins y Liesje Schreinemacher di un carga di partinan di spare pa F-35 for di Hulanda. Aduana a puntra e ministerio si nan kier a blokia e pedido di e partinan aki a causa di e guera. Abogadonan na e MInisterio a adverti cu tabatin riesgo di crimennan di guera pa motibo cu Israel a usa e F-35 den bombardeo di escala grandi den areanan sumamente apobla di Gaza Strip.
E pais a bombardea mas di 12,000 punto na Gaza Strip desde comienso di e guera cu Hamas dia 7 di october. Mas di 10,000 Palestino incluyendo miles di mucha a ser asesina den solamente un luna. Apesar di e advertencia aki, e Ministernan a dicidi di permiti pa cumpli cu e pedido. Segun NRC su fuentenan, blokia e entrega lo a dana Hulanda su relacion cu ambos Israel y Merca, cual ta Israel su aliado militar mas importante.
E Ministerio di Exterior a confirma na NRC cu e exportacion di articulonan na “partnernan internacional den e programa F-35,” incluyendo Israel, no tin restriccion riba dje. Segun NRC su fuentenan, un avion di transport Israeli a colecta e partinan na F-35 European Regional Warehouse den e base aereo na Woensdrecht.
E warehouse aki na Woensdrecht ta un di e 3 centronan di distribucion for di cual partinan di spare pa jetnan F-35 ta ser distribui mundialmente. Un licencia general ta aplica na exportacion di partinan di spare di F-35 cual tur pais cu ta partner por usa. Sinembargo, e gobierno Hulandes por interveni si e exportacion bay contra politica di exterior Hulandes. Entre ana 2004 y ana 2020, Hulanda a nenga e permiso di exportacion pa articulonan militar na Israel 29 biaha.
