(AP) — Como 3mil migrante di Centro America, Venezuela, Cuba y Haiti ayera a blokea trafico riba un di e careteranan principal den sur di Mexico exigiendo transito of visa di salida pa yega frontera Mericano.
E caravana di migrante a sali riba pia for di ciudad di Tapachula, cerca di frontera cu Guatemala, dia 30 di october canando nort den direccion di Merca. E contingente, incluyendo cantidad di mucha y muhe, despues a stop di cana na Huixtla, otro pueblo den estado sur di Chiapas, unda nan a purba di haya documentonan temporal di biahe pa crusa Mexico.
Ayera e migrantenan a blokea boothnan di inspeccion di caretera pafo di Huixtla.
Activista Irineo Mujica, un di e organisadornan di e marcha, a bisa cu e blokeo lo continua pasobra migrantenan tin miedo di criminal, traficador y extorsionistanan cu lo por ataca nan si nan sigui cana. Cantidad di migrante tambe lo prefera di tuma bus, pero hopi biaha ta preveni nan di haci esey si nan no tin documento. “Nos sa cu nos ta causando incomodidad pa e Mexicanonan y nos ta pidi dispensa,” Mujica a bisa. “Pero e cartelnan di droga ta secuestrando nos, matando nos.”
Migrante Hondureño, Herson Fernandez tabata biahando cu su esposa y tres yiu; yorando, el a bisa cu nan a keda sin placa. “[Autoridadnan] no ta duna nos un contesta, nan no ta duna nos documento,” Fernandez a bisa. “Idea ta pa yega Merca pasobra eynan tin un miho futuro pa e muchanan, berdad ta cu nos ta haciendo e pa nan.”
Pero Comision di Ayudo di Refugiado di gobierno Mexicano a duna un declaracion diamars laat destacando cu no ta emiti visa di transito.
E caravana actual tabata entre esnan mas grandi desde juni 2022. Caravana di migrante na 2018 y 2019 a hala hopi mas atencion. Pero cu hasta 10mil migrante yegando frontera Mericano den simannan recien, e marcha di 30 di october ta apenas un gota den e hemchi.
Den pasado, tactica di Mexico tabata mas tanto pa warda pa e caminantenan cansa, y djey ofrece nan lift back na nan paisnan di origen of centronan alternativo, mas chikito, di procesamento.
E frontera sur occidental di Merca a confronta dificultad pa maneha e cantidad aumentando di migrante for di Sur America cu ta move rapidamente for di Estrecho di Darien entre Colombia y Panama prome cu bay nort. Pa september, 420mil migrante, cu ayudo di traficadornan Colombiano, a pasa door di e estrecho den e aña te e fecha, segun cifranan Panameño ta ilustra.
