Recientemente, CBS a publica e Indice di Prijs di Consumo pa e periodo entre september 2022 y september 2023. Den esaki, a destaca cu durante e periodo aki, nuebe di diesdos sector a registra aumento di prijs.
Indice di Prijs di Consumo
Den e ultimo diesdos (12) lunanan, e CPI a subi cu 1.7%, unda nuebe (9) di e diesdos (12) sectornan a registra subida di prijs.
E subidanan cu tabatin e mayor efecto riba e CPI a wordo registra pa e sectornan di “Comunicacion” (7.3%), “Cuminda y bebida noalcoholico” (4.5%), “Restante bienes y servicio” (3.2%), “Vivienda” (1.4%) y “Restaurant y hotel” (7.6%), causando un efecto di respectivamente, 0.57, 0.51, 0.37, 0.36 y 0.35 ppt.
E subidanan den e restante sectornan a contribui cu un efecto di 0.58 ppt riba e CPI di September 2022 – September 2023. E subidanan aki a wordo contraresta parcialmente door di principalmente un caida den e indice di e sector di “Recreacion y cultura” (-5.0%), cu a contribui cu un efecto di -0.47 ppt.
E caidanan den e restante sectornan a contribui cu un efecto di -0.56 ppt riba e CPI di September 2022 – September 2023.
E subida den e sector di “Comunicacion” a wordo causa door di un subida di 7.9% den e categoria “Servicio di telefon y fax”, causando un efecto di 0.59 ppt. E subida den e sector di “Cuminda y bebida no-alcoholico” a wordo causa principalmente door di un subida den e categoria “Cuminda” (4.2%), causando un efecto di 0.42 ppt. E subida den e sector di “Restante bienes y servicio” a wordo causa principalmente door di un subida di 5.4% den e categoria “Cuido personal”, causando un efecto di 0.21 ppt. E subida den e sector di “Vivienda” a wordo causa principalmente door di un subida di 13.5% den e categoria “Mantencion y reparacion di vivienda”, causando un efecto di 0.70 ppt. E subida den e sector di “Restaurant y hotel” a wordo causa door di un subida den e categoria “Cuminda pafo di cas” (8.1%), causando un efecto di 0.36 ppt. E caida den e sector di “Recreacion y cultura” a wordo causa principalmente door di un caida di 12.8% den e categoria “Vacacion”, causando un efecto di -0.33 ppt.
Canasta di consumo
Den e ultimo aña cu a pasa 60.5% di productonan den e canasta di consumo di e CPI a conoce un aumento di prijs causando un efecto di 5.31 ppt, mientras cu 34.6% ta mustra un caida di prijs, cu a contribui cu un efecto di -3.62 ppt y pa e restante 4.9% no tabatin cambio den prijs. E indice di “Bienes” (-0.1%) a registra caida, causando un efecto di -0.09 ppt, mientras cu e indice di “Servicionan” a registra un subida di 4.4% y a causa un efecto di 1.78 ppt.
Bestaansminimum
Den e ultimo diesdos (12) luna e bestaansminimum pa un hogar consistiendo di dos (2) adulto y dos (2) mucha (edad 0-15 aña) a registra un subida di Afl. 119, di Afl. 5,309 na September 2022 pa Afl. 5,428 na September 2023.
E subida aki a wordo causa principalmente door di un subida den e sector di “Cuminda y bebida no-alcoholico” (Afl. 96).
Cambio di prijs di petroleo, utilidad, gasolin y diesel
E prijs promedio pa bari di petroleo a conoce un subida di US$ 2.74 (3.2%) di US$ 85.37 na September 2022 pa US$ 88.11 na September 2023. E indice di Energia a baha cu 1.6% den e ultimo aña y a causa un efecto di -0.30 ppt. E indice di “Gasolin” (5.9%) a registra un subida, causando un efecto di 0.30 ppt, mientras cu e indice di “Diesel” (-6.7%) a registra un caida, causando un efecto di -0.03 ppt. E indice di “Electricidad” (-6.8%) a registra caida, causando un efecto di -0.57 ppt, mientras cu e indice di “Awa” no a registra cambio. E restante 404 bienes y servicio hunto, a conoce un subida di 2.4% y tabatin hunto un efecto di 1.99 ppt.
Cambio di prijs di Cuminda y servicio di catering
Den e ultimo diesdos (12) lunanan e indice di “Cuminda & servicio di catering” a subi cu 5.5%. E indice di “Cuminda na cas” a conoce un subida di 4.5%, unda nuebe (9) di e diesun (11) indicenan di e gruponan di “Cuminda na cas” a subi durante e periodo aki. E indice di “Sucu, jam y otro tipo di cos dushi” a conoce un subida di 14.3%, e subida mas grandi entre e gruponan di “Cuminda na cas”. Ademas otro subidanan significante a wordo registra den e indicenan di “Restante productonan pa alimentacion” (12.0%), “Pan y otro productonan di grano” (8.2%), “Bebida no-alcoholico” (6.9%), “Lechi, keshi y webo” (6.7%) y “Batata, yuca y batata dushi” (6.2%). E caida mas grandi durante e periodo aki a wordo registra den e indice di “Fruta” (-4.5%). E indice di “Cuminda pafo di cas” a registra un subida di 8.1% den e ultimo diesdos (12) lunanan.
