Durante e conferencia di prensa di gobierno dialuna mainta Prome Minister, Evelyn Wever-Croes, a splica cu el a toca e tema di Venezuela durante su reunion relaciona cu e topico di Relacion Exterior. El a indica cu mirando e situacion actual cu e suavisacion di sancion riba Venezuela di parti di Merca, Gobierno di Aruba ta analisando den ki forma esaki por beneficia Aruba.

Prome Minister a indica cu durante e reunionnan relacion cu tema di Relacion Exterior a toca e topico di Venezuela un biaha mas. El a specifica cu a enfoca ariba e acuerdo di Barbados cu a wordo cera algun dia atras entre e Plataforma Unitaria, cu ta representa oposicion di Venezuela, y e regimen di Nicolas Maduro.

El a splica cu den e acuerdo di Barbados aki e regimen chavista a compromete su mes pa organisa eleccionnan presidencial liber y cu nan lo respeta derechonan humano. Den e acuerdo di Barbados tambe e partidonan a acorda cu eleccion presidencial ta bay tuma luga e di dos trimester di aña 2024.

Consecuentemente Merca a dicidi di suavisa algun di e sancionnan cu e tabatin imponi ariba e gas, petroleo y oro di Venezuela pa un periodo di seis luna. Prome Minister a remarca cu Gobierno di Aruba ta mirando e situacion, y si Venezuela cumpli cu e acuerdo aki, pa mira kico nan por saca di probecho pa Aruba di e suavisacion di e sancionnan aki.

“Pero nos ta keda cautelosamente optimista y sperando cu Venezuela cumpli cu su parti pa despues Merca no bin pone mesun sancionnan atrobe y stroba tal bes tur locual cu nos a cuminsa traha riba dje,” el a señala.

E mandatario a indica cu durante e reunionnan aki el a subraya e impacto cu e crisis di Venezuela tin riba un pais chikito manera Aruba, pero no obstante, el a menciona, cu Aruba ta carg’e pasobra ta un pais bisiña y hopi ciudadano di Aruba tin lasonan familiar, economico y cultural cu Venezuela. “Sinembargo e impacto ta keda un impacto grandi pa un pais chikito manera Aruba,” el a resalta.

Reportera di Bon Dia Aruba a puntra Prome Minister si e esaki lo por hiba na talbes e reapertura di e frontera aereo directo entre Venezuela y Aruba. E mandatario a splica cu e deliberacionnan riba reapertura di frontera aereo cu Venezuela di vuelonan directo, pasobra frontera pa vuelonan indirecto ta habri caba, no ta den relacion cu e acuerdo di Barbados, pero ta mas bien un procedura cu nan ta canando.

“Nos ta haciendo un analisis di nos riesgonan y unda nos ta menos bon para nos tin cu fortifica,” el a señala.

El a sigui splica cu Aruba tin cu prepara, den caso cu tuma decision pa habri frontera di e brug aereo directo cu Venezuela, cu por ta hopi hende ta bay pidi asilo atrobe ora cu nan drenta y Aruba mester ta ekipa pa e scenario aki.

Prome Minister a agrega cu Aruba tin un unidad di asilo cu ta man yen cu trabao caba y no por trata mucho caso si bin hopi adicional y pues ta trahando pa fortifica e aspecto aki.

Na mesun momento el a añadi cu inmigracion tambe mester ta mas fortifica y el a menciona cu nan tin cu traha tambe riba un palabracion cu nan tin cu autoridadnan di Reino y cu Venezuela cu ta implica cu un persona cu kier biaha pa Aruba mester pasa un cierto screening prome cu nan por drenta pasobra si ta personanan cu tin antecedente criminal na Aruba, nan no lo haya e visa y nan no lo por drenta.

El a indica cu tin varios tema cu nan tin cu trata pa un futuro reapertura di frontera aereo directo cu Venezuela cu no ta relaciona tanto cu e acuerdo di Barbados.

El a remarca cu nan ta mira e acuerdo di Barbados mas den oportunidadnan economico. El a splica cu por ehemplo Corsou ya caba ta pensando di bay importa gasolin di Venezuela. “Aworaki cu e sancionnan a wordo lanta, aunke e ta solamente pa seis luna, e ta un posibilidad pa Aruba tambe,” el a resalta.

Prome Minister a señala cu e ta algo cu ta riesgoso si pasobra si Merca dicidi di introduci e sancionnan atrobe den caso cu Venezuela no cumpli cu loke nan acorda den e acuerdo di Barbados, esey por nifica problema atrobe.

El a indica cu gobierno ta mirando con nan atende cu esaki y el a menciona cu Minister Glenbert Croes tin esaki riba su lista di prioridad pasobra Aruba kier HFO mas barata pa generacion di awa y coriente y nan kier gasolin mas barata tambe na Aruba y, segun el a señala, Minister di Energia ta trahando riba diferente otro area con nan por yega na mesun meta.

“Nos ta sigui traha riba prepara pa e momento cu nos por habri e frontera aereo y cu nos por anuncia ki dia esey ta bay ta,” el a finalisa su contesta.

Na Venezuela e situacion ta keda tenso y a pesar di e acuerdo firma na Barbados, diferente medionan di comunicacion Venezolano ta reporta cu chavistanan no ta cumpli y pues esaki ta nifica cu posiblemente Merca lo sanciona atrobe.

Entre otro persecucion di oposicion ta sigui sin tregua y esaki ta haci cu compra di gasolin lo keda un problema. Ademas Venezuela no tin produccion suficiente y constante ainda y esaki ta keda un riesgo grandi pa desvia di e suministro normal di gasolin y diesel.

Frontera entre Aruba y Venezuela ta cera desde 2019 y dia 1 di mei di e aña aki Aruba a habri frontera maritimo cu Venezuela. E comision encarga cu e negociacionnan pa un posible reapertura di frontera aereo directo ta evalua pa continua e ciere aki cada tres luna. Den luna di juli ultimo, Prome Minister a informa cu despues cu e ultimo tres luna a pasa, a tuma e decision pa prolonga e ciere.