Durante conferencia di prensa di Gobierno, Prome Minister Evelyn Wever-Croes a anuncia cu Arubahuis lo tin su director nobo pa comienso di December 2023. Pa cu e posicion aki, a cuminsa un proceso di nombramento na Juni 2022, cu a culmina na November 2023, den un decision na fabor di Sra. Joselin Croes.
Manera ta conoci, Arubahuis ta representacion di Aruba, na Hulanda, y e mision di Gobierno pa Arubahuis ta pa tin un Aruba visibel na Hulanda, den Reino y na Europa. Pa logra esaki e meta aki, Aruba tin su Minister Plenipotenciario, den nomber di Sr. Ady Thijsen, y awor un director nobo, cu ta Sra. Joseline Croes.
Prome Minister den un comunicado di prensa a splica cu e nombramento di Sra. Joselin Croes tabata un vacatura cu a wordo publica den Juni 2022. Segun Wever-Croes, a tuma e decision di “no haci e nombramento aki uno politico manera añanan anterior” y na luga di esaki a habri e vacatura pa diferente candidatonan por a solicita. Wever-Croes a sigui splica cu pa cu e proceso di nombramento, Gobierno a introduci un comision cu tabata encarga cu e proceso aki, cu tabata consisti di Departamento di Recurso Humano, Departamento di Impuesto y un representante di Ministerio di Asuntonan General. Un total di 23 persona a solicita, y basa riba e criterionan, a scoge 3 candidato, cu a bay door di un entrevista na unda cu a scoge Sra. Joselin Croes como e miho candidato pa e posicion aki.
Na october 2022, e comision a acerca Prome Minister, cu ta encarga cu Arubahuis, pa presenta e proposicion aki, y na Februari 2023, e proposicion aki a wordo aproba pa Conseho di Minister. Despues di esaki, a haci algun investigacion mas, incluyendo esun di Veiligheidsdienst, cual tambe a sali positivo.
Prome Minister a splica cu Sra. Joselin Croes ta actualmente e Minister Plenipotenciario pa Aruba na Washington. Durante e ultimo cinco añanan, Sra. Croes a traha hopi duro riba promove y crea oportunidadnan pa Aruba y pa Arubianonan, cu partnernan na Merca. Akinan riba e terenonan economico, innovacion, cultural, enseñansa y tambe area diplomatico. Un di e metanan principal di Sra. Croes tabata pa Aruba fortifica lasonan cu Merca y Canada, y pa saca mas probecho posibel di esaki. Sra. Croes prome cu su funcion na Washington tabata Chief of Staff di Minister di Husticia, y prome cu esey e tabata tin su propio oficina di abogado. Aparte di ta abogado e tin aworaki tambe su Masters Degree den Environmental Management. Sra. Croes ta conoci pa su determinacion, positivismo, pasion, y disciplina pa logra su metanan. E ta domina 4 idioma y tin e curiosidad pa siña mas idioma y cultura di otro paisnan.
Lectornan di Bon Dia Aruba tambe por recorda cu Sra. Croes tabata miembro di partido POR.
“Mi ta desea Sra. Joselin Croes hopi exito, den e funcion nobo aki, cu el lo cuminsa December proximo. Tambe mi kier gradici Sra. Glenda Hernandes cu a tuma e encargo di director interino pa un periodo mas largo di loke nos a pidie na comienso. Señora Hernandes a sa di trece stabilidad y trankilidad na Arubahuis, y pa esaki, nos ta gradici su persona. Cu e nombramento di e director nobo, Arubahuis ta laga un periodo dificil atras, y ta sigui cu positivismo padilnati. Di mi curason un danki na tur empleado y staff completo di Arubahuis pa tur nan esfuerso y dedicacion” Prome Minister a expresa.
