Dialuna mainta durante conferencia di prensa di Gobierno, Prome Minister Evelyn Wever-Croes a anuncia cu diahuebs awor, 9 di november, Aruba lo ta ricibiendo bishita di Prinses Beatrix. E bishita aki no lo ta igual na e bishita di Rey Willem-Alexander hunto cu Reina Maxima y Prinses Amalia, sino e lo ta un bishita mas cortico y intimo.
Prome Minister a indica cu Prinses Beatrix ta biniendo Aruba riba invitacion di Dutch Caribbean Nature Alliance, cu lo ta acompañando su persona pa bishita e otro islanan den Caribe. Motibo di e bishita ta e congreso di DCNA tocante solucionnan amigable pa cu naturalesa pa restaura ecosistemanan den islanan di Caribe Hulandes. E prinses ta patron di DCNA.
E agenda pa e dia aki ta inclui bishita na Telefon pa Hubentud, y riba su propio iniciativa, Prinses Beatrix, bishita un “speeltuin” pa wak con esakinan ta bay. Tambe durante su estadia e lo participa na e congreso di DCNA cu lo tuma luga na Universidad di Aruba.
Igualmente, segun Cas Real di Hulanda, riba dia 10 di november e Prinses ta bay haci un bishita na Parke Nacional Arikok. FPNA a inicia un proyecto akinan pa reintroduci un especie di parha cu a bira extinto na e isla back den naturalesa. E parha aki tin un distribucion limita, haciendo su reintroduccion na Aruba specialmente significante. E prinses ta bay presencia un presentacion riba e programa aki di preservacion di biodiversidad y ta bay observa e parhanan na e sitio. Tambe e ta bay discuti e importancia di e proyecto aki cu esnan involucra.
Atardi, e prinses ta bay atende e ciere di e congreso DCNA na Universidad di Aruba.
