Camara di Comercio (Kamer van Koophandel, KvK) ta un instituto importante den e economia di Aruba. Diahuebs 26 di october a firma un reglement van orde nobo. Un momento significante, caminda Minister di Asuntonan Economico, Sr. Geoffrey Wever, conhuntamente cu presidente di Camara di Comercio, Sr. Gavril Mansur, y den presencia di director di Camara di Comercio, Sr. Martijn Balkenstein, a firma e reglement van orde nobo.
E reglement van orde ta stipula con KvK ta organisa, con e ta wordo representa, e comisionnan cu e tin, como tambe obligacionnan legal y financiero, y finalmente con e ta funciona dentro di Aruba su economia.
“Camara di Comercio ta un partner importante pa gobierno di Aruba”, segun minister Wever. E ta conta di un colaboracion estrecho caminda pa proyectonan cu ta trata economia semper ta busca oido e.o. di KvK. Tambe tin reunionnan frecuente caminda ta discuti desaroyonan economico y pasonan pa sigui mehora.
Minister Geoffrey Wever ta gradici e ekipo completo y e bestuur di Camara di Comercio pa nan trabou, cumpliendo cu un rol importante pa organisa comercio na Aruba, y esfuersonan continuo conhunto pa progresa e clima empresarial di Aruba.
