(AP) – Grupo di R&B New Edition lo hiba nan musica na Las Vegas cuminsando proximo aña. E grupo di 6 miembro nomina na Grammys a anuncia dialuna cu New Edition: Las Vegas lo cuminsa dia 28 di februari.
E grupo a confirma 6 show na Wynn LAs Vegas su Encore Teathre, unda actonan manera Diana Ross, Duran Duran, Lionel Richie y Brad Paisley a subi escenario. “Nos a haya un oportunidad unico,” Ronnie DeVoe, un miembro fundador di New Edition a expresa. New Edition ta inclui miembronan Michael Bivins, Bobby Brown, Johnny Gill, Ralph Tresvant y Ricky Bell.
Dialuna su anuncio a bini dianan despues cu e grupo a duna un presentacion sumamente coreografia como parti di un tributo pa Spinners na Rock & Roll Hall of Fame su ceremonia cu a tuma luga na New York. DeVoe a bisa cu e banda a tende e fanaticonan su peticionnan, particularmente via rednan social, pa nan duna conciertonan na Sin City. “Nos ta emociona pa subi escenario y sigui cu e legacia,” el a expresa.
Despues di dos tour NorteAmericano consecutivo, New Edition a plania un concierto di forma mas intimo, cual lo tin asiento pa solamente 1,480 persona. “Esaki lo ta hopi mas teatrico cu nos tournan Legacy y Culture,” Brown a comenta. “Esaki lo ta hopi mas intimo. Nos kier ta cerca y personal cu nos fanaticonan.”
New Edition a ser funda pa amigonan di tempo cu nan tabata chikito na Boston y a bira un di e bandanan original cu a forma e base di loke nos ta conoce awe como ‘Boy Band.” E grupo a lansa nan album debut den aña 1983 y a rehubenece e escena di musica den e molde di The Jackson Five cu hitnan manera “Candy Girl,” “Mr. Telephone Man” y “Cool It Now.”
