(NLTimes) – Hulanda ta un di e tiki pais na mundo unda e riesgo social a reduci aña pasa, principalmente pa motibo di un politica generoso di gobierno protegiendo hende contra e aumento di costo di bida. Hulanda a yega e top dies riba e Indice di Resiliencia Social (SRI) di seguro di credito Allianz Trade. Dinamarca ta den top di e indice, sigui pa Finlandia y Suisa.
Hulanda a mustra e mehoracion mas grandi den seguridad social entre paisnan occidental, cu mayoria di nan a cay den e indice. “Esaki ta principalmente pa motibo di e paketenan generoso di sosten di gobierno Hulandes,” segun Johan Geeroms, director di Risk Underwriting Benelux na Allianz Trade. E paketenan di sosten a mitiga e impacto economico di e pandemia y prijsnan halto di energia, y tambe a distorciona e imagen pa Hulanda, el a bisa.
A pesar cu Hulanda a alcansa e top dies e aña aki, Allianz Trade ta keda preocupa. Sosten di gobierno a solamente “tapa e problema,” segun Geeroms. “Na Hulanda, nos tambe ta mira cu mas y mas hende ta confrontando dificultad cu debe problematico. Mas y mas hende ta luchando pa pone pan riba mesa. Inflacion a duna un golpi mayor na hopi pais, incluyendo Hulanda.”
“Riesgo social a aumenta mundialmente, principalmente pa motibo di aumento den costo di bida,” Allianz Trade a bisa. E compania a midi e resiliencia economico y social di 185 pais usando 12 indicador. Compara cu 2021, e indice a cay cu 2.1 punto e aña aki.
“E indicadornan cu nos ta usa ta hopi diferente. Considera participacion laboral, stabilidad politico, desigualdad den entrada of confiansa den gobierno. Aumento den riesgo social y disturbio tin consecuencia significante pa economia. Globalmente, e situacion a deteriora, y nos ta kere cu e tendencia negativo aki ta bay continua,” Geeroms a bisa.
