Den fin di siman Korps Politie Aruba (KPA) a tene diferente control di trafico y autonan sospechoso. Durante e controlnan aki KPA a confisca varios arma di candela cu nan a haya den autonan y a detene e personanan cu tabatin e armanan aki den nan posesion.

Diadomingo marduga, ora cu polis a bay controla un auto sospechoso dilanti un club nocturno na Palm Beach, Polis a bin encontra un arma di candela den e auto. Mesora a confisca esaki como tambe e auto y Polis a detene tambe e dos sospechosonan y a transporta nan pa Warda di Polis.

Mesun diadomingo marduga, Polis a controla otro auto sospechoso dilanti un club nocturno na Palm Beach y a bin descubri un otro arma di candela. Polis a confisca e arma y e auto mesora y di biaha tambe a detene e chauffeur y a bay cune na warda di polis.

Posesion di arma di candela ta birando un problematica mas grandi den comunidad y a pesar di esfuersonan di KPA pa purba reduci e problematica aki, toch e armanan di candela ta keda circula.

Den luna di october ultimo Ministerio Publico a saca nan verslag pa aña 2022 y den e jaarverslag tin varios dato interesante, pero tambe tin algun tendencia cu ta destaca. Den esaki, un di esnan mas impactante ta e aumento den incidentenan cu arma di candela.

Bon Dia Aruba a trece dilanti anteriormente con posesion di arma ta un di e delitonan mas comun entre menornan di edad. Pero e jaarverslag ta destaca tambe cu tabatin mas incidente di delito involucrando arma di candela na 2022 compara cu 2021.

Segun e jaarverslag di Ministerio Publico, na 2022 tabatin un total di 131 ofensa di arma, compara cu 84 na 2021. Sinembargo, na 2021 tabatin un caso di importacion ilegal di arma sin permiso, mientras cu na 2022 no tabatin ningun.

Tabatin un aumento den e cantidad di incidente cu arma di candela na 2022. Ministerio Publico y polis a anuncia nan maneho intensifica pa cu posesion di arma di candela durante un conferencia di prensa dia 29 di juli 2022, manera declara pa Procurador General (PG) y hefe di polis.

Estadisticanan di polis ta mustra un aumento den ocurencia di posesion di arma entre hendenan jong. KPA a realisa varios investigacion riba incidentenan reporta di tiramento. Adicionalmente tabatin incidentenan cu no a keda reporta pero si a keda treci dilanti informalmente cerca polis.

For di november 2022 te dia 28 di december 2022, Ministerio Publico y KPA a inicia un campaña di colecta di arma di candela, cu dos container posiciona na wardanan di polis na Oranjestad y San Nicolas.