Den aña 2023, tabatin alrededor di 3,200 solicitud pa paspoort na Aruba. Pero pa proximo aña 2024, Censo ta premira cu lo tin casi 12mil persona cu lo ta solicitando un paspoort nobo. Esaki lo por genera presion riba Censo.
Censo a comunica recientemente cu for di dia 9 di maart di 2014, e validez di tur paspoort Hulandes pa hende mayor di 18 aña di edad a aumenta di 5 aña pa 10 aña. Pa esnan menor di edad, e validez a keda 5 aña. Regularmente, e totalidad di solicitud pa renobacion di paspoort ta keda stabiel tur aña, segun Censo a informa riba nan pagina di Facebook, cu un cantidad di aproximadamente entre 3mil pa 4mil solicitud cada aña.
Sinembargo, e cambio den e tempo cu e paspoort ta keda valido pa hende mayor di 18 aña di edad ta trece cune cu despues di 10 aña ta bay tin un aumento drastico den cantidad di paspoort Hulandes cu ta bay caduca na aña 2024. Censo ta premira cu esaki ta bay crea presion den e emision di paspoort, y pa e motibo aki, a haci un apelacion na tur cliente pa traha afspraak pa solicitud di (renobacion) di paspoort di antemano, y no warda te cu e paspoort ta caduca.
Segun Censo a enfatisa, nan no tin ningun influencia riba e periodo di espera prome cu e paspoort yega y por entrega esaki na e persona cu a solicit’e. Riba e cifranan cu Censo a comparti, por nota cu cuminsando aña 2024 ta bay bira un periodo hopi druk, y ta pidi pa clientenan di Censo tene cuenta cu esaki.
Finalmente, pa loke ta trata paspoort di emergencia, Censo ta urgi pa tene bon na cuenta cu Gabinete di Gobernador ta otorga paspoort di emergencia solamente den casonan di sumo urgencia. Nan ta enfatisa cu e rekisitonan pa por bin na remarca pa un paspoort di emergencia ta hopi estricto, pues ta insisti pa tur persona haci nan afspraak pa paspoort na tempo pa asina sigura cu esaki ta yega na e momento necesario.
