Ta conoci cu na Aruba tin cantidad di persona cu ta operando un servicio di transporte clandestino – auto, bus y hasta motorcycle cu ta duna servicio di transporte na otronan sin cu ta registra of tin permiso pa esaki. Tin varios factor cu ta conduci na e problema aki, y alabes, transporte clandestino tambe ta causa otro problemanan den comunidad.

A diferencia di servicio di taxi y transporte publico manera tram, bus y bus chikito, e servicio di transporte clandestino no tin registro ni vergunning. Hopi biaha e hende cu ta maneha e servicio aki no ta regla pa cumpli cu tur condicion pa por core auto riba caminda tampoco, manera keuring y seguro di auto, y tin biaha, hasta tin di nan ta core sin rijbewijs. Algun di nan tampoco tin estadia legal na Aruba, pues ta indocumentado.

E problema aki no ta nobo, de hecho, tin varios aña caba ta papiando di dje.

Tin varios motibo pakico transporte clandestino ta prolifera na Aruba. E ruta y frecuencia di busnan no ta suficiente pa tur ciudadano por move segun nan necesidadnan, y taxi legal por resulta hopi caro si un persona mester haci uso di esaki tur dia pa bay trabao, scol, haci compras, etc. Tin hopi hende cu pa diferente motibo no por tin nan mesun auto, y ta haya nan mes den necesidad di un modo di transporte personal. Tambe tin falta di transporte pa mucha cu tin cu bay scol, traimerdia, of actividadnan despues di scol manera hobby of deporte.

Tambe mester considera e influencia di e problemanan actual na Arubus. Den nos Editorial di dia 15 di februari ultimo, Bon Dia Aruba a comenta tocante e problemanan na Arubus:
“E compania aki mester percura pa transporte publico, y ta topa cu problema grandi cu pa un parti nan no por resolve. For di un punto di vista di planificacion urbano, y dentro di esey di transporte publico organiza na un manera economicamente viable y pagable, nos tin un situacion hopi desfaborable, pa motibo di un poblacion hopi chikito pa e superficie riba cual e poblacion ta plama. Por ehemplo, normalmente un ciudad di alrededor di 100.000 habitante na Europa no ta acapara e casi 100 km2 manera na Aruba, sino talvez un cuarto parti di e superficie ey. Esey ta haci cu e distancianan ta mas cortico y e rednan ta mas compacto y cu un frecuencia razonable, y tin mas cliente disponible na un distancia razonable di cana, no solamente den e oranan clave mainta y atardi, pero na otro momento tambe. Esey ta haci cu Arubus den e oranan di mayor movimento mainta y atardi ta core cu bus yen, pero na otro momento e busnan enorme ey ta core practicamente bashi. Den e proyecto structuralmente caro aki ta dificil pa imagina un modelo unda e usuario ta cubri tur gasto cu su ticket. Pa loke ta e mal administracion, esey ta keda sin solucion tanten tur gobierno ta mas preocupa pa nan influencia politico den e empresa, cu pa garantiza bon gerencia.”

Desde e tempo ey no a tende mucho hopi mas tocante e situacion na Arubus.

Di otro banda, tin un comunidad grandi di persona indocumenta cu tin mester di transporte regular y confiable, y hopi biaha, entre nan mesun comunidad ta duna y haci uso di e servicio di transporte clandestino. Esaki ta coordina a traves di appnan di comunicacion riba smartphone.

E problema ta resulta na momento cu un di e vehiculonan di transporte clandestino aki ta haya nan mes involucra den por ehemplo accidente di trafico. Manera menciona, hopi di nan no tin seguro, pues ta resulta dificil na momento cu nan ocasiona un accidente pa e otro partido por haya e compensacion cu ta coresponde. Den caso cu e chauffeur ta indocumentado, esaki tambe ta nifica cu e persona lo keda deteni y e auto posiblemente confisca.

Otro riesgo cu usuarionan di transporte clandestino ta confronta ta cu no tin proteccion pa consumidor. Asina a mira casonan di hende cu a bira victima di robo y estafa door di proveedornan di transporte clandestino, y pa motibo di nan situacion legal como indocumentado na Aruba, hopi di e victimanan no tin recurso pa ricibi husticia.

Igual cu cualkier otro industria clandestino – tambe economia informal – e operadornan di transporte clandestino no ta paga belasting ni contribucionnan social, ni ta tene nan mes na leynan laboral di Aruba, loke ta resulta den un cantidad di consecuencia negativo pa sociedad. Por ehemplo, ta crea un competencia inhusto pa e transporte cu si ta legal y registra. Door di no contribui cu impuesto di manera debido, ta nifica cu ta haci uso di caya y otro infrastructura sin cu ta contribui na e mantencion di esaki. Finalmente, e trahadornan den e industria di transporte clandestino no ta contribui cu AZV – mientras cu potencialmente si ta haci uso di esaki – y no tin e derechonan di pensioen y Svb cu trahadornan den sectornan regular si ta disfruta.

Bon Dia Aruba a tuma contacto cu minister di Transporte, Ursell Arends, pa puntra tocante e maneho pa cu e industria di transporte clandestino y ki stapnan ta tumando actualmente pa regula esaki.

Arends a menciona cu e problema di transporte clandestino tin varios factor, entre nan, e mobilidad y rutanan y infrastructura di transporte publico, esta Arubus y autobus. Pa di dos, e usuarionan cu no den tur caso, pero si den hopi caso, ta persona indocumenta. Ademas, Arends a destaca cu tin falta di regulacion, por ehemplo den e caso di schooltransport. “Esakinan ta bin back riba maneho cu ta stimula mobilidad en general, regulacion y control,” Arends a indica.

Tocante e maneho aki, Arends a bisa cu actualmente ta trahando riba e maneho pa cu esaki. “E maneho pa transporte y mobilidad ta finalisando, pero mester tene cuenta cu e reto y limitacionnan cu nos tin,” el a bisa. “Por ehemplo di mankracht pa eherce control, infrastructura, situacion financiero alarmante di Arubus, y mas.”

Sinembargo, Arends a sigura cu tur e factornan aki “tin nos atencion y ta atendiendo cu nan un pa un.”

Potret di archivo.