Ayera, a traves di un comunicado di prensa, Ministerio Publico a informa cu ayera a detene un sospechoso di e notificacion falso di bom na Holiday Inn Hotel diabierna ultimo, dia 27 di october.
OM a indica cu e sospechoso ta un trahado di e hotel. No a indica e motibo cu a haci e notificacion falso ni tampoco a duna mas detaye di e caso aki na e momento.
Tabata diabierna tardi cu a drenta informe na central di emergencia cu tabatin un notificacion di bom (bom melding) na e hotel Holiday Inn. Inmediatamente a dirigi polis y bombero na e sitio, cu mesora a evacua hende for di e hotel pa nan seguridad. Polis a cera e area y a check cada camber piso pa piso, pero na final no a encontra nada. Polis a pone e caso bao investigacion, y awo ta conoci cu a haci un aresto den e caso.
